Орал қаласында мемлекеттік қызметшілер күніне орай ұйымдастырылған "Білімділер додасы" зияткерлік ойынында ауданымыздың мемлекеттік қызметшілерінен құралған "Қарашығанақ" командасы жеңімпаз атанды.
Он күн көлемінде өтіп, бүгінгі білім додасының финалдық ойындарында бөрлілік команда өзге ойыншылардан оқ бойы озық шықты. Сөйтіп жергілікті командадағы әр ойыншы өздерінің озық ойлы, жоғары кәсіби маман екендіктерін дәлелдеді.
Жалпы, сайысқа 15 командадан құралған 100-ден аса мемлекеттік қызметшілер қатысты. Ойынның басты мақсаты Қазақстандық патриотизм және жоба арқылы жан-жақты, білімге құштар, ойы озық зияткерлерді анықтау, ынталандыру, облысымыздың мемлекеттік қызметшілері арасында зияткерлік сайыстың деңгейін көтеру, зияткерлерді жан-жақты ойлай білуге және топ болып жұмыстануға баулу болды.
Білім сайысының әрбірінде алты негізгі, екі қосалқы мүшесі болды.
Жергілікті "Қарашығанақ" командасының капитаны Бөрлі ауылдық округінің әкімі Азилхан Зарифов болып, құрамында аудандық экономика және қаржы бөлімінің басшысы Гүлнар Шамғонова, аудандық ТҮКШжАЖ бөлімінің басшысы Дастан Ақмамбетов, аудандық АХАТ бөлімінің басшысы Алмагүл Сандібекова, аудандық ішкі саясат бөлімінің бас маманы Руслан Азаматов, аудан әкімі аппаратының бас инспекторы Ізбасар Габидуллин, мемлекеттік сатып алу және бухгалтерлік есеп бөлімнің басшысы Абзал Суйнишев және аудан әкімі аппаратының мемлекеттік-құқықтық жұмысы бөлімінің бас маманы Нұрдәулет Хамидоллаұлылар болды.
Ойынның іріктеу кезеңінде қала мен аудандардың, облыстық басқармалармен, департаменттердің қызметшілері қатысты. Зияткерлік доданың бірінші кезеңінде саналы, зерделі қызметшілер іріктеліп, финалдық ойындарға жолдама алды. Олардың қатарында «Қос өзен» (Казталов ауданы), «Қаратөбе» (Қаратөбе ауданы), «Жаңақала» (Жаңақала ауданы), «Орда» (Орталық мемлекеттік органдары аумақтық бөлімшелерінің құрамасы), «Эверест» (Тасқала ауданы), «Ақжайық» (Ақжайық ауданы) және «Қарашығанақ» (Бөрлі ауданы) командалары болды.
Сан түрлі тақырыптарды қамтыған сайыста командалар аз уақыт ішінде логикалық, тарихи, және мемлекеттік қызмет саласында қойылған сұрақтарға жауап іздеді.
Зияткерлік доданың екінші орынын тасқалалық «Эверест» командасы алса, үшінші орын жаңалалық «Жаңақала» командасына бұйырды.
Аудан намысын білім сайысында абыроймен қорғаған мемлекеттік қызметшілерді құттықтаймыз!
Айым Нұрғалиева,
Бөрлі ауданы
zhaikpress.kz
