Бәйтеректік 28 түлек «Алтын белгі» иегері атанды. Переметныйда аудан әкімі Марат Тоқжановтың қатысуымен үздік мектеп бітірушілерін марапаттау рәсімі өтті.
«Ақ жол, саған, жас түлек!» атты салтанатты шараға ұстаздар, ата-аналар мен мектеп түлектері қатысты.
- Құрметті түлектер, сіздердің осындай дәрежеге жеткендеріңіз ата-ана, ұстаздарыңыз бен жалықпай оқып, біліп, үйренгендеріңнің арқасы. Өмірде екі нәрсе таңдауда қателеспеу керек дейді ғой. Соның бірі - мамандық таңдау. Деңгейлеріңіз жоғары, сондықтан таңдауларыңыз да биік болар деп ойлаймын. Алла Тағала жар болып, армандаған оқу орныңыза түсіп, студенттік шақтарыңыз қызықты өтсін. Адам - өмірде жолаушы. Сіздер үлкен жолға шықтыңыздар, алдарыңыздан жақсы жандар көп кездессін. Болашақтарыңыз жарқын болғай, - деген Марат Тоқжанов түлектерге «Алтын белгі» мен аттестаттарды салтанатты түрде табыс етті.
Шара барысында ата-аналарға да құрмет көрсетіліп, олар аудан әкімінің алғыс хатымен марапатталды.
Түлектер атынан сөз алған «Алтын белгі» иегері, Қадыр Мырза Әлі атындағы орта мектептің үздігі Миржан Құсенов ата-аналар мен ұстаздарға алғысын білдіріп, құрдастарына ҰБТ-да сәттілік тіледі. Ата-аналар атынан Марина Необутова сөйлеп, жастардан үлкен үміт күтетінін айтып, «Алтын белгіге» лайық түлектер көбейе түссе деген ізгі тілегімен бөлісті.
Бізге пікір бөліскен Макаров ауылдық округінің әкімі Еркін Әбілкәкімов қызы Зүлфия өзіне артқан үмітті ақтап, «Алтын белгіге» ие болып жатқанын айтты.
- Қызым жүрек қалауымен бастауыш сыныбының мұғалімі мамандығын таңдап отыр. Әулетімізден ұстаздық қызмет еткен жандар көп шыққан. Зүлфия солардың ізін басып, істерін жалғағысы келіп отырғанына қуаныштымыз. Өзі де, мінезі де сол салаға сай келетін қызымыз болашақта ел мерейін асыратын азаматша болады деп сенеміз, - деді Еркін Әбіләкімов.
Нұрсәуле Әбілпейсова,
Бәйтерек ауданы
zhaikpress.kz
