Облыс әкімдігінде 23 маусым – Мемлекеттік қызметші күніне арналған салтанатты іс-шара өтті. Жиында облыс әкімінің орынбасары Бақытжан Нарымбетов мерекелік лебізін білдірді.
Құрметті мемлекет-тік қызмет саласының ардагерлері, қызметшілері! Баршаңызды кәсіби мерекелеріңізбен құттықтаймын! Мемлекеттік қызметшілер – мемлекет пен қоғамның айнасы. Мемлекеттік қызметші болу – мәртебелі міндет, халық алдындағы зор құрмет. Олардың арасында біркүндік табысы үшін емес, халықтың мәңгілік алғысы үшін, наны үшін емес, намысы үшін қызмет етіп жүрген азаматтар жетерлік. БҰҰ Бас Ассамблеясының қарарымен 2003 жылдан бастап бұл күнге халықаралық мереке мәртебесі берілді. Қазақстан Республикасы Президентінің Жарлығымен 2013 жылдан бері мемлекеттік қызметшілер күнін атап өтіп келеміз. Президент Ұлттық құрылтайда атап көрсеткендей, біз әділетті Қазақстан құру жолында адал азамат болуымыз керек. Әр ісімізді адал атқарсақ, әділетті Қазақстан құра аламыз. Ал бұл істің локомативі – алдыңғы шепте жүретін мемлекеттік қызметшілер. Олар өздерінің іс-әрекеттерімен, ниет-қылықтарымен адалдықтың үлгісі болуы қажет. Сіздерге мол бақыт тілеймін. Еліміздің гүлденуі жолында атқарып жатқан қызметтеріңізде табысты болыңыздар, – деді Бақытжан Хаберұлы.
Іс-шарада Б. Нарымбетов Ақжайық ауданының кәсіпкерлік және ауыл шаруашылығы бөлімінің басшысы Әлібек Бакировқа, Бәйтерек ауданы әкімі аппаратының құжаттамалық қамтамасыз ету және қаржы-шаруашылық жұмысы бөлімінің басшысы Талғат Қантеміровқа, Бөкей ордасы ауданындағы Темір Масин ауылдық округі әкімі аппаратының бас маманы Нұрлыбек Жұмағалиевке және бірнеше мемқызметшіге облыс әкімінің алғысхатын табыс етті. Сондай-ақ мемлекеттік қызметшілер арасында өткен облыстық спартакиадада IIІ орын алған облыс әкімдігінің, II орын иеленген Орал қаласы әкімдігінің және I орын алған Бөрлі ауданы әкімдігінің командалары марапатталды. «Отбасым – үйім, отбасым – тірегім» атты мемқызметшілердің отбасылары арасында ұйымдастырылған эстафета жарысының жеңімпаз-жүлдегерлері Шәріповтер отбасы (І орын, Теректі ауданы), Мырзағалиевтер отбасы (ІІ орын, Сырым ауданы) және Масалимовтер отбасына (IIІ орын, Орал қаласы) марапаттары табысталды. Сондай-ақ «Ана тілім – арым» дәстүрлі облыстық байқауының үздіктеріне – БҚО ПД кәмелетке толмаған балалар ісі жөніндегі учаскелік инспекторы, полиция капитаны Айнұр Халиолла (І орын), Теректі аудандық ішкі саясат бөлімінің басшысы Рауан Сатыбалдиев (ІІ орын) және Бөкей ордасы ауданы әкімі аппаратының бас маманы Исатай Құрмашевке (ІІІ орын) жүлделері табыс етілді. Салтанатты іс-шарада барысында ҚР Мемлекеттік қызмет істері агенттігінің БҚО бойынша департаментінің басшысы Мұрат Байсалов әріптестерін құттықтады. Бөрлі аудандық жұмыспен қамтуды үйлестіру және әлеуметтік бағдарламалар бөлімінің басшысы Ольга Басимова, Казталов аудандық кәсіпкерлік және ауыл шаруашылығы бөлімінің басшысы Сергей Тоқпанов және Қаратөбе аудандық Қоскөл ауылдық округі әкімі аппаратының бас маманы Бейбіт Жұмақай ҚР Мемлекеттік қызмет істері агенттігінің «Үздік мемлекеттік қызметші» төсбелгісіне ие болды. Сондай-ақ «Үздік ауыл әкімі» байқауының облыстық кезеңінің жеңімпазы, «Үздік ауыл әкімі» атанған Тасқала ауданындағы Аманкелді ауылдық округінің әкімі Саягүл Галиеваға құрмет көрсетілді. Бірнеше мемқызметші ҚР МҚІА БҚО бойынша департаменті басшысының алғысхатымен марапатталды. Осы саланың ардагері, БҚО мемлекеттік, банк мекемелері және қоғамдық қызмет көрсету қызметкерлері салалық кәсіподағының төрағасы Серік Сүлеймен мерекелік лебізін айтты. Жәнібек аудандық кәсіпкерлік және ауыл шаруашылығы бөлімінің бас маманы Асылбек Базарбаев, БҚО мамандандырылған ауданаралық әкімшілік соты кеңсесінің бас маманы-сот мәжілісінің хатшысы Ақмарал Сәрсенова ҚР Мемлекеттік қызмет істері агенттігінің төрағасы Дархан Жазықбаевтың алғысхатымен марапатталды.
Сондай-ақ «Үздік әдеп жөніндегі уәкіл» облыстық конкурсының жеңімпазы, Жәнібек ауданы әкімі аппаратының басшысы, әдеп жөніндегі уәкілі Нұрсұлтан Серікке диплом табысталды. Салтанатты іс-шара соңында мемлекеттік қызметке алғаш рет орналасқан екі жас маман ант берді.
Ясипа Рабаева,
Суреттерд түсірген: Оксана Каткова
zhaikpress.kz
