Биылғы алты айда Қазақстанда аумағы 7,1 млн м2 астам тұрғын үй пайдалануға берілді. Бұл 2022 жылдың осы кезеңімен салыстырғанда 11,3% артық, деп хабарлайды ҚазАқпарат.
Ұлттық статистика бюросының мәліметінше, өткен алты ай мен биылғы жарты жылды салыстыратын болсақ, өңірлер арасында жаңадан пайдалануға берілген тұрғын үйлердің ауданы бойынша Абай облысы көш бастап тұр: өсім – 56,3%. Одан кейінгі орында 43,4% өсіммен Шымкент қаласы, 39% – Жетісу облысы.
2023 жылдың қаңтар-маусым айлары аралығында еліміз бойынша 16 677 тұрғын үй нысаны іске қосылды. Оның ішінде 16 083 – жеке үй, 574 – көппәтерлі үй, қалған 20 – жатақхана.
Көпқабатты үйлерде 63,1 мың пәтер пайдалануға берілді. Бұл өткен жылмен салыстырғанда 15,1% артық. Көпқабатты үйлердің 7,6%-ын мемлекеттік құрылыс компаниялары, 91,2%-ын жеке компаниялар, 1,2%-ын шетелдік компаниялар салған.
Сонымен қатар ауылдық жерлерде де тұрғын үйлерді пайдалануға беру бойынша өсім байқалды. Мәселен, 2023 жылдың қаңтар-маусым айларында ауылдарда 1,6 млн м2 астам тұрғын үй берілді. Бұл 2022 жылдың сәйкес кезеңімен салыстырғанда 10,7% артық.
