Авто-вело, аттылар шеруінен кейін сыртқы сахнада салтанатты шара жалғасын тапты. Оған аудан әкімі Жұмагелді Батырниязов қатысып, спортшыларды мерекелерімен құттықтады.
– Еліміздің Президенті Қасым-Жомарт Тоқаев Жолдауында халыққа, соның ішінде балаларға спорт қолжетімді болуы үшін инфрақұрылыммен қамтамасыз етуді тапсырған болатын. Ауданымызда бұл жұмыс жүйелі түрде жалғасын табуда. Біздің аудан спорт саңлақтарынан кенде аудан емес. Әйгілі балуандарымыз Асқар Шайхиев, Оралбек Қожагелдин ағаларымыздың жолын жалғаған басқа да жас жеткіншектер ауданымыздың атын әлемдік деңгейге, республикаға танытып жүр. Жуырда өткен ардагерлер арасындағы спорт сайысында Ғилаж Молдашұлы бастаған ауданымыздың спорт ардагерлері жүлделі екінші орынға қол жеткізді. Өткен аптада «Даму бала» платформасы бойынша «Орта» орталығы ашылып, балаларға дзюдо, шахмат секілді спорт үйірмелері ашылды. Биыл Құспанкөл, Өлеңті ауылдарында спорт алаңдары іске қосылуда. Спортшыларға, жаттықтырушыларға табыс тілеймін, шәкірттеріңіз жетістіктерге жетіп, көк туымызды желбірете берсін! Мереке құтты болсын!- деді Жұмагелді Жолдыбайұлы.
Аудан басшысы А.Шайхиев атындағы БЖСМ Жетікөл бөлімінің күрес үйірмесінің жаттықтырушысы Думан Сахановқа, Шолақаңқаты бөлімінің жеңіл атлетика жаттықтырушысы Маратжан Мәулетовке, «Қайсар» спорт клубының қызметкері Бекзат Бекниязовқа БҚО денешынықтыру және спорт басқармасының басшысы Қ.Есендияровтың алғыс хатын табыс етті.
Ардагерлер арасында облыста өткен ІІІ спартакиадада жалпыкомандалық есеп бойынша 2 орынға ие болған сырымдық ардагерлерге диплом табысталды.
Сырым ауданының бәйге федерациясының президенті, аударыспақтан БЖСМ жаттықтырушысы Төлеби Қайыржанов «Спорт жұлдыздары» журналы редакция алқасының шешімімен «Ұлттық спорт жанашыры» төсбелгісімен марапатталды. Төсбелгіні Төлебидің өңіріне аудан әкімі Жұмагелді Батырниязов тақты.
Спортта аудан намысын қорғап жүрген Нұртаза Жұмағалиев, Өтеулі Қонақбаев, Төлеген Нұрманов, Тасқын Жұмағұлов, Кенжегүл Исатаева, Дархан Жанқылышев, Азиза Қадырова, Нұрсұлтан Мырзахметов, Абай Кенжебаев, Нұрсұлтан Өтепов, Гүлайым Лұқпанова, Нұрдәулет Бақтығұлов, Темірлан Ғаббасов, Руслан Балмұратов, Бекзат Серік, Нұртас Оқасов, Ерлан Шоқанов, Әсет Нығмет, Ғаділбек Жайсұлтанов, ауыл спортының жанашырлары Ернар Байдашев, Заур Қажымов аудан әкімінің алғыс хатын иеленді.
Ардагер спортшы Ғилаж Қаналиев құттықтау сөз алды. Шара мерекелік концертке ұласты.
Шынар Молданиязова,
Сырым ауданы
zhaikpress.kz
