Оралдық «Ғажайып» би ансамблі Түркия мен Румыния төрінде өнер көрсетті

Орал қаласы NIS-тің «Ғажайып» би ансамблі Түркия мен Румынияда өткен халықаралық түркітілдес елдер фестивалінде өнер көрсетті.

6DB5E350-82A5-46AD-B971-815E40D2361F

Түрік елінің Афьон-Карахисар қаласындағы фестиваль аталған түрік елді мекеніндегі Жеңістің 101 жылдығына орай ұйымдастырылса, Румынияда CNR-UNESCO қолдауымен түрік-татар фестивалі ретінде өзге ұлт өнерпаздарын бір алаңға жинады. Бұл туралы Орал қаласы физика-математика бағытындағы Назарбаев Зияткерлік мектебінің баспасөз қызметі хабарлады.

Айта кету керек, бауырлас елдердегі бұл шараларға «Ғажайып» би ансамблі Қазақстан атынан өнер көрсету үшін іріктеу кезеңінен өтіп, арнайы жолдама алған болатын.

4259EFED-FD5F-4A3E-B6FC-A4C8DAC7AB7A

Фестивальде Болгария, Польша, Македония, Босния және Герцеговина, Үндістан, Грузия, Румыния, Гиресун, Тюфем, Бандырма муниципалитетінің Иран түріктері және Афьон-Карахисар муниципалитетінің халықтық би ансамблі, сондай-ақ Татарстан, Венгрия, Морокко, Албания т.б елдердің бишілері өнерлерін ортаға салды. Әр халық өздеріне тән ерекшеліктерін бейнелейтін би қойылымдарын сахналады.

– Біз ұсынған «Ауыл кеші көңілді», «Бастаңғы», «Жастар» қойылымдарына түркітілдес елдердің барлығы тамсанды. Әр қойылымның сюжетіне мән беріп, халқымыз жайында қосымша ақпараттар сұрап, тіпті киімімізге қызықты. Афьон қаласында қазақ халқының алғаш өнер көрсетуі екен. Бұл да бір тарих. Кеше Румынияға сапарымызды да сәтті аяқтадық. Бір қуантатыны, өзге елдерге де шақырту алдық. Бұл біздің би ұжымының жоғары бағаға ие болғаны деп білемін, - дейді ансамбль жетекшісі Аслан Сержанұлы.

Мектеп өнерпаздары Афьон қаласының әкімінің алғысхатымен, қос фестивальде көрсеткен ерекше өнерлері үшін мақтау қағаздарымен және ескерткіш кәдесыйлармен марапатталды.

«Ғажайып» би ансамблі – Орал қаласы Назарбаев Зияткерлік мектебінің мақтанышы.

Репертуарындағы терең мағынаға негізделген би қойылымдарымен халықаралық, республикалық би байқауларында топ жарып жүр.