Жәнібек ауданына облыс әкімінің орынбасары Тілепберген Каюпов келіп, бірқатар құрылыс нысанын аралады. Оның ішінде Жақсыбай мен Қамысты ауылында салынып жатқан фельдшерлік-акушерлік пунктіне аялдап, Қамысты ауылының кіреберісіне жол жабынын төсеу жұмысымен танысты.
Кезекте тұрған жандарға арналған үйлердің құрылысына барып, жұмысшылармен пікір алмасты. Ол құрылыс нысандарын аралап жүріп, сапаға мән берді. Кез келген жұмыстың сапалы болғанын талап етіп, ел игіліне берілетін ғимараттардың құрылысына салғырт қарамау керектігін жеткізді. Жақсыбай ауылында бой көтерген фельдшерлік-акушерлік пунктінің ел игілігіне берілуі жақын. Мемлекеттік сатып алудың нәтижесінде «Альтаир» ЖШС жеңімпаз атанып, құрылыстың маңызды жұмысын бастап кеткеніне біраз уақыт болды. Құрылыстың ойдағыдай аяқталуына 300 млн көлемінде қаражат бөлінген. Дегенмен қажетті материалдар жеткілікті болғанымен, нысанды пайдалануға уақытынан кеш беретінін жеткізді. Оған себеп – ауа-райының қолайсыздығы. Оны жиналған ауыл тұрғындары да растап, жауын-шашынның көп жауғанын айтты. Ауыл ақсақалдары да сол маңнан табылып, Тілепберген Ерсайұлымен әңгімелесті. Ауылдағы өзге де мәселелерді қаузап, шешілу жолдары жайында ақылдасты. Одан өзге ауылда мәдени-спорт кешені салынады. Тұрғындардың қуанышында шек болмай, облыс әкімінің орынбасарына:
- Өз өлкеңе осылай қолұшын созып, жиі келіп тұр, - дегені сол еді Тілепберген Ерсайұлы басшылықтың ешқандай ауылды бөліп-жармай, бәрін бірдей қолдайтынын жеткізді.
- Бұл менің туған өлкем немесе жақындарым тұратын ауыл еді деп басымдық беруге болмайды. Жоспар бойынша барлық аудан мен ауылды, елді мекендерді дамытуға арналған жобаларды жүзеге асырамыз. Осындай ойдан арылатын уақыт жетті. Бәріміз теңбіз. Бөлінбейік, - деді.
Қамысты ауылына аттанған басшы көптеген жақсы жайтқа куә болды. Жаңадан салынып жатқан медициналық пунктіне, күрделі жөндеудегі кіреберіс жолға және тағы да басқа құрылыс нысандарына аялдап, жұмыстың сапасын бақылады. Аудан әкімі Тимур Шиниязов пен орынбасары Жақсылық Абдолов, аудандық сәулет, қала құрылысы және құрылыс бөлімінің басшысы Манарбек Әдиев жұмыстармен таныстырып, алдағы жоспармен бөлісті.
Әлібек Қаржау,
Жәнібек ауданы
zhaikpress.kz
