Бүгін Жәңгір хан атындағы Батыс Қазақстан аграрлық-техникалық университетінде студенттер «Менің жетістігім – менің нәтижем» жобасы шеңберінде ғалым ұстаздармен кездесті.
Білім ордасының 60 жылдығына орай өткен шараны «Парасат» ақпараттық білім беру орталығы ұйымдастырды. Бұл жолы білім алушылар қос профессор – философия ғылымдарының докторы Тілекжан Рысқалиевпен және ветеринария ғылымдарының докторы Мәлік Шәлменовпен жүздесіп, тағылымды әңгімелерін тыңдады.
Ұзақ жылдар ұстаздық қызмет атқарып, ғылым саласында өздерінің қолтаңбаларын қалдырған қонақтар өздерінің өмірлік тәжірибелерімен бөлісіп, ғылымдағы жетістіктері туралы баяндап, жастарға ақыл-кеңестерін айтты.
Нарын құмында дүниеге келіп, ілім қуып Киевтегі мемлекеттік университетінде білім алып, кейіннен әлемдік және отандық философияны зерттеп, көптеген еңбектер, мақалалар жазған Тілекжан Хасенұлы ғұламалардың даналық сөздерін тілге тиек етіп:
– «Ғылым таппай мақтанба, орын таппай баптанба» деген ұлы Абайдың өсиетін мен ақтадым деп айта аламын. Ғылым жолында жүрген шәкірттерім бар. Іргелі жоғары оқу орны –Жәңгір хан университетінде күні бүгінге дейін еңбек етіп келемін. Бұл оқу орны Алматы мен Астанадағы білім ордаларынан кем емес, – деді. Биыл 85 жасқа аяқ басқан ғалым-ұстаздың сөз арасында әзілдеп отырып айтқан әңгімесі жастар үшін әсерлі болғаны сөзсіз.
Өз кезегінде Мәлік Шәлменұлы да ветеринарлық салаға қалай келгені, өнегеге толы еңбек жолы туралы айтып өтті. Киелі Қаратөбе өңірінде дүниеге келген ғалымның есімі жерлестеріне жақсы таныс. Осы аудандағы Егіндікөл орта мектебінде білімді оқушыларға ғалымның атындағы шәкіртақы тағайындалып, профессор атындағы биология кабинеті ашылған. М.Шәлменов 2006 жылдан бері БҚАТУ-да «Ветеринарлық медицина және мал шаруашылығы» институтында еңбек етіп, кәсіби мамандар даярлау ісіне сүбелі үлес қосып келеді.
Ардагер ұстаздар жастарды аянбай еңбектенуге, сапалы білім алуға шақырды.
БҚАТУ медиа орталығы
