24 қазан - Кітапханашылар күніне орай Сырым ауданы әкімдігінің мәдениет, тілдерді дамыту, дене шынықтыру және спорт бөлімінің Мұқадес Есламғалиұлы атындағы аудандық орталықтандырылған кітапхана жүйесінің ұйымдастыруымен ерекше форматтағы мерекелік кеш өтті.
Мерекелік шарада аудан әкімнің орынбасары Артур Шерғалиев руханият ордасы – кітапхана саласында қызмет етіп жүрген барша қызметкерді кәсіби мерекемен құттықтап, «Қазақстанның құрметті кітапханашысы» төс белгісін аталмыш сала қызметкерлерінің өңіріне тақты.
Демалыс орталығының әншілері Айгүл Сисенова «Қазағым» деп, Серік Сағидуллин «Кітапханашы» деп ән шырқап, мереке иелерін тебірентсе, экраннан кітапхана туралы бейнежазба кітапханашылар назарына ұсынылды.
- Кітапханашылар өздерінің күнделікті еңбегімен шексіз ақпаратқа, әлемдік мәдениет пен ғылым құндылықтарына, адамзаттың даналығы мен біліміне қолжетімділікті қамтамасыз етеді. Оқырманды таңғажайып кітап әлеміне жетелейді, ұлттық дәстүрімізді сақтап, дамытуға үлес қосып жүрген кітапханашылардың орны қашан да биік, - деп ағынан жарыла Жымпиты ауылдық ардагерлер кеңесінің төрағасы Ғилаж Қаналиев сөз сөйлеп, Сырым аудандық ардагерлер кеңесінің төрағасы Ә.Ғалымовтың алғысхатымен ардагер кітапханашыларды марапаттады.
Жерлес ақын М.Қажиахметовтың «Кітапхана мен кітапханашыларға» өлеңін, ақын Б.Әлімжановтың «Кітапханашы» өлеңін Сәндібек Өтеғалиев, Ләззат Берғалиева, Азамат Жетпісов нақышына келтіре оқыды.
Сөз кезегін алған аудандық мәслихат хатшысы Шынар Дүйсенғалиева, мәдениет, тілдерді дамыту, дене шынықтыру және спорт бөлімінің басшысы Ерлан Сәрсенов кәсіби мереке иелерін құттықтап, әдемі естеліктерімен бөлісті.
Кітапханашылар облыстық Мәдениет басқармасының алғысхатымен, аудандық мәдениет бөлімінің алғысхатымен, Ж.Молдағалиев атындағы облыстық әмбебап ғылыми кітапханасының, Х.Есенжанов атындағы облыстық балалар және жасөспірімдер кітапханасының алғыс хатына ие болды.
Одан бөлек, аудандық М.Есламғалиұлы атындағы аудандық орталықтандырылған кітапхана жүйесінің директоры Айнұр Уәлиахметова әріптестеріне жылы лебізін білдіріп, облыстық «Самал» газетінің, аудандық кітапхана жүйесінің атынан бірқатар әріптесіне алғыс хат табыстады.
Кеш соңын Серік Сарғозиев сырнаймен ауыл жайлы тамылжыған әнімен қорытындылады.
Айжан Амангелдина,
Сырым ауданы
zhaikpress.kz
