Казталов ауданы аудан болып құрылғалы жыл санап қарыштап, дамып, көркею үстінде. Өткен тарихты айтпағанда соңғы уақытта ауданымызға қарасты 47 елді мекен болса, 100 пайыз көгілдір отынмен қамтылып, ауыл тұрғындары үшін маңызды ауыз су тарту, жол салу жұмыстары жүргізілуде. Мұнымен бірге бірқатар ауылдарда әлеуметтік нысандардың құрылысы жүріп жатыр. Көрген көзге еліміз Тәуелсіз мемлекет атанғалы Казталов ауданының да даму көрсеткіштері жоғары. Жоғары көрсеткіштердің қатарында ауданымыздың дамуының негізгі драйвері – ауыл шаруашылығы. Мал басы өскен сайын кәсіпкерлер мен ауыл тұрғындарының әл-ауқаты көтерілуде. «Бәрін айт та бірін айт» демекші, барлығы елдің тыныштығының арқасы.
25 қазан күні – Республика күніне орай және ауыл шаруашылығы саласы қызметкерлерінің кәсіби мерекесін түйіндеу мақсатында аудан орталығы Казталов төрінде аудан әкімдігінің қолдауымен, аудандық кәсіпкерлік және ауыл шаруашылығы бөлімі, салалық бөлімдер мен округ әкімдіктерінің ұйымдастыруымен Аудан күні аталып өтті.
Казталов ауылының батыс бағытындағы кең алқапта ақшаңқай киіз үйлер, киелі сахна құрылып, кәсіпкерлер келген көпшілікке ыстық қуырдақ, кәуап пен қымыз-шұбаттарын ұсынды.
Көпшілік шараның шымылдығын С.Садықов атындағы мәдени-демалыс орталығының өнерпаздары сомдаған театрландырған көрініс арқылы ашылды. Шарада Казталов ауданының әкімі Асланбек Сарқұлов, облыстық мәслихат депутаты Самат Хасанов, аудандық мәслихат төрағасы Сәрсенбай Молдашев жиналған көпшілікті айтулы мерекемен құттықтап, ауданымыздың дамуына сүбелі үлес қосып, өз салаларында жемісті еңбек етіп, үздіктер қатарынан көрініп жүрген бір топ азаматтарды марапаттады. Сонымен қатар жуырда Моңғолия елінде өткен әлем чемпионатында қола жүлде алып, ауданымыздың атын тағы бір мәрте асқақтатқан чемпион Айдын Елемесовке кәсіпкер Айбынбек Абитов ат мінгізді.
Той қызығы ат тұяғының дүбіріне толған бәйге мен спорттық шаралармен ұласты. Тай жарыс, құнан жарыс, топ бәйге, аламан бәйге ұйымдастырылып, арғы шеті Қарағанды облысы, бергі шеті Атырау, Маңғыстау облыстарынан және көршілес аудандардан арнайы келген сейістері мен болат тұяқ тұлпарлары сынға түсті.
Сонымен бірге білекті де жүректі ауыл азаматтарының күштерін сынаған армрестлинг, арқан тартыс, қой көтеру, жаяу жарыс секілді спорттық шаралар тойдың көрігін қыздырды.
Шара соңында жиналған көпшілік киіз үйлерде даярланған дастарханнан дәм татып, бәйге мен спорттық шараларда жүлде алғандарды марапаттау рәсімі өтті.
Қой көтеру жарысында жаңақалалық Ерасыл Бақыт дес бермей, жүлдеге тігілген қойды еншіледі. Арқан тартудан ауданымыздың тепсе темір үзетін жігіттері мықтылық танытып, 1 орынды Бостандық, 2 орынды Тереңкөл, 3 орынды Болашақ ауылының азаматтары бөліп алды. Арқан тартуға нәзік жандылар да қатысып, 1 орынды Жалпақтал, 2 орынды Бостандық, 3 орынды Казталов ауылының қыз-келіншектері еншіледі.
Ал қол күресінен 1 орынға Дәулет Ажғалиев, 2 орынға Бауыржан Бақыт, 3 орынға Қайсар Хабилов ие болды. Жаяу жарысқа сынға түскен желаяқтар 6 шақырымға жүгіріп, 1 орынға жерлесіміз Баубек Ілиясов, 2-3 орынға бәйтеректік Жарас Айтуаров пен Кирилл Агахонов табан тіреді. Халықтың қошеметіне бөленген, Қазақ күресін шебер меңгерген палуандар боз кілемде белдесті.
Қарсыласты шақ келтірмей, бәрін жыққан көктеректік Бегайдар Меңдешев 1 орынды, ақпәтерлік Еркебұлан Нығмет пен Ерген Сатыбалдиев 2-3 орынды місе тұтты.
Халықтың арқасын қоздырып, тағатсыздыққа бөлеген тай жарысында Тайпақ ауданынан келген Құбайдолла Биғазиевтің тайы бірінші келсе, көктеректік Жанболат Ахметкереев тайы екінші, Сырым ауданының Шерхан Қайырсапаның тайы үшінші болып мәреге жетті.
Құнан жарыста 1 орынға шыңғырлаулық Талғат Бисембиевтің, 2 орынға тайпақтық Құбайдолла Биғазиевтің, 3 орынға Көмекші ауылындағы Айдос Айтболатовтың құнандары иеленді.
Топ бәйге де тартысты өтіп, Бөрлі ауданының сейісі Махмут Шариповтың сәйгүлігі бірінші орынды, атыраулық Сейтжан Балжігітовтың арғымағы 2 орынды, сырымдық Шерхан Қайырсапаның жүйрігі 3 орынды қанжығасына байлады.
Аламан бәйгеде шапқан Қамбар ата ұрпақтарының ішінен Казталовтық Ерлан Уаресовтың тұлпарының бағы жанып, 1 орынға тігілген 2 млн. теңгені ұтып алды.
Барлық жарыстарға қатысып, жүлде алған азаматтарға дипломдармен қомақты қаршылай сыйлықтар табысталды.
Ауданымыздың бар жетістігін паш еткен дүбірлі тойыдың жоғары деңгейде өтуіне ат салысқан Казталов аудандық ат федерациясы және қаржылай қолдау көрсеткен шаруа қожалық жетекшілері мен кәсіпкерлерге алғыс білдіреміз!
Қайрат Жақып,
Казталов ауданы
zhaikpress.kz
