Баку қаласында физика, химия және математика пәндері бойынша оқушылардың «Таланттарды даярлау зертханасы» халықаралық олимпиадасы мәреге жетті.
Бұл туралы оқу-ағарту министрлігінің баспасөз қызметі хабарлады.
Зияткерлік сайысқа Қазақстан, Әзербайжан, Өзбекстан, Тәжікстан, Қырғызстан және Грузия құрама командалары қатысты. Қазақстан құрама командасы үш қатысушыдан тұрды. Олимпиада қорытындысы бойынша олар бір күміс медаль ұтып алып, үш командалық орынға ие болды.
Мақсаты - оқушылардың жаратылыстану-математикалық бағыттағы ғылымдарға деген қызығушылығы мен шығармашылық қабілеттерін анықтау және дамыту, дарынды балалардың зияткерлік дамуына қолдау көрсету үшін қажетті жағдайлар жасау, жастар арасында ғылыми білімді тарату және дәріптеу.
Олимпиада қорытындысы бойынша:
Күміс медаль және командалық үшінші орын - Дария Бектұрсын - дарынды балаларға арналған №8 лицей-мектебінің 8 сынып оқушысы, Павлодар қаласы;
Командалық үшінші орын - Абылай Аппас - Алматы қаласындағы «Республикалық физика математикалық мектебі» коммерциялық емес акционерлік коғамының 9 сынып оқушысы;
Командалық үшінші орын - Ерасыл Алтынбек - Астана қаласының дарынды ер балаларға арналған «Білім-инновация» лицей- интернатының 9 сынып оқушысы.
Құрама команданың жетекшісі:
Нұрдәулет Қаласов - PhD доктор, әл-Фараби атындағы Қазақ ұлттық университетінің аға оқытушысы.
Айта кетсек, «Таланттарды даярлау зертханасы» жобасы бірнеше жыл қатарынан Әзірбайжанда өтіп келеді. Бұл олимпиаданың басқа олимпиадалардан айырмашылығы, оның қатысушылары - 15 жастағы жасөспірімдер физика, математика және химия пәндері бойынша жоғары білім деңгейін көрсетуі керек.
