Бүгін Оралда «Star» білім және өнер орталығы мен Батыс Қазақстан облыстық тарихи-өлкетану музейі бірлесіп, Жұлдыз шағынауданында орналасқан «Star» орталығында «Қазақ қызы» жобасы аясында қыздарды қолөнерге баулу мақсатында «Шекелік және шашбау» істеуден аналар мен қыздарына шеберлік сағатын өткізді.
Шарада облыстық музейдің экскурсия ұйымдастыру және экскурсиялық қызмет көрсету бөлімінің меңгерушісі Жанаргүл Сырымова музей қорындағы ХІХ-ХХ ғасырлардағы қазақ халқына тән күміс әшекей бұйымдарын шекелік, шашбау, өңіржиек, құстұмсық жүзік, құдағи жүзік және тағы басқа бұйымдарды таныстырды.
Қолөнерді дәріптеген шараға қырық ана мен қырық қыз қатысты.
Айта кетейік, «Star» білім және өнер орталығындағы хореография, домбыра, көркемсурет, қолөнер, вокал, үстел теннисі, шахмат, ағылшын тілі, орыс тілі, математика, жылдам оқу және көркем жазу курстарына барлығы 280 оқушы қатысады. Аталған үйірмелерге орталық оқушыларды көршілес Достық, Новенький ауылдарынан тегін алып келеді.
Ал «Қазақ қызы» жобасының тұсауы осыдан бір ай бұрын кесілген. Тұсаукесерде суретші аналар мен қыздарға арт-терапия өткізген.
Жоба ережесі бойынша «Қазақ қызы» жобасына қатысқан қыздардың аналарына аптасына екі рет қазақ биі сабағы өтеді. Айына бір рет ауқымды шара ұйымдастырылады.
Орталықта қыздар жас тілші, домбыра, сән өнері, музыка, Хореография, Актерлік өнер, Этика және Аспаздық үйірмесіне қатыса алады. Аналарға Хореография, Арт-Терапия, Аспаздық, Қолөнер сабағы және Тренинг-кездесулер өткізіледі.
Фотоның авторы: Мәди Салық
zhaikpress.kz
