Аудандық коворкинг орталығында «Бөкей ордасы ардагерлері» қоғамдық бірлестігінің ұйымдастыруымен Социалистік Еңбек Ері, Ескендір Есімовтің туғанына 95 жыл толуына орай «Еңбек түбі – береке» атты танымдық шарасы өтті.
Аталмыш шараға аудандық мемлекеттік архивінің директоры Қуаныш Елемесов, еңбек ардагерлері Ерболат Мұратов, Марат Қадешов, Зейнеп Абдрахманова, Сайфетден Қожантаев, Шәкира Ишанғалиева, Қуандық Жұмағалиев, Нәйлягүл Нарболова, Арыс Ажығалиев, Уағаз Нұрғалиев, Жігер Омаров және М.Мәметова мен М-С.Бабажанов мектебінің оқушылары мен колледж студенттері қатысты.
Жиын басында қатысушыларға Ескендір Есімов ағамыз туралы бейнеролик көрсетіліп, Тілеген Арыстанбеков Ескендір атамыздың дара жолы туралы естелігімен бөлісті.
- Бүгінгі жиынға қатысып отырған аға буынға Ескендір Есімов ағамыз таныс болса, жастардың көбі Ескендір ағамыз туралы білмеуі де мүмкін. Жалпы ауданымыз «Социалистік Еңбек Ері» атағына лайық болған азаматтарға бай десек болады. Аталмыш биік жетістікке 25 жерлесіміз қол жеткізген. Бұл көрсеткіштер кей аудан түгіл облыстарда жоқ.
Сол «Социалистік Еңбек Ерінің» бірі Ескендір Есімов ағамыз болды. Өз еңбегімен, маңдай терімен жетістіктерге жеткен адам. Өмірбаянымен таныссақ, ағамыздың білімі де жоқ. Дегенмен, өз еңбегіне адалдықпен қараған жерлесіміз биіктен көріне білді.
Бүгінгі шараның мақсаты - жас буынды ауданымыздың қайта құрылуына үлес қосқан, қарапайым еңбегімен танымал бола білген азаматтармен таныстыру. Жалпы еңбек арқылы жетістіктерге жетуге болатындығын жеткізу, - деді Тілеген Арыстанбеков.
Аудандық орталықтандырылған кітапханалар жүйесінің кітапханашысы Гүлзат Темірханқызы еңбек ерінің өмірбаяны туралы баяндаса, кітапханашы Фариза Әбілкәрімова «Дәріптеу – парыз, құрметтеу – міндет» дегендей шопан атаға арналған көрмемен таныстырды.
Аудандық мәслихат төрағасы Лариса Қайырғалиева Ескендір Есімов туралы естеліктерімен бөліссе, аудандық мемлекеттік архивінің директоры Қуаныш Елемесов Ескендір Есімов туралы жазба дереккөздері мен архив құжаттары туралы баяндады.
Шараға қатысқан басқа да қонақтарымыз да Ескіндір Есімовке қатысты естеліктермен бөлісті.
Еркебұлан Бисенғалиев,
Бөкей ордасы ауданы
zhaikpress.kz
