Жуырда Ақмола облысында шаңғы туризм техникасынан Қазақстан Республикасының чемпионаты өтті.
Аталмыш додада еліміздің он облысынан жиырма команда, жүз жиырмадан астам қатысушы болды.
БҚО құрама командасынан балалар, жасөспірімдер және ересектер тобы қатысты.
Соның ішінде Жәнібек ауданы «Балалар-жасөспірімдер туризмі және экология орталығының» туризм бөлімінің әдіскері Ерлан Неғметов пен шәкірттері Азат Картес, Әлібек Серік үлкен жетістікке жетті.
Атап айтсақ, жеке қашықтықтан балалар тобы бойынша Әлібек Серік пен жасөспірім ұлдар арасында Азат Картес жүлделі 3-орынды иеленді.
Сонымен қатар техникалық қашықтықтан балалар тобы мен жасөспірімдер тобы 1-орынды қанжығасына байласа, ересектерден құралған топ 3-орынды місе тұтты.
Ал кросс жорық қашықтығы бойынша жасөспірімдер 2-орын, ересектер тобы 3-орынды еншіледі.
Жалпы командалық есеп бойынша балалардан және жасөспірімдерден құралған топтар жеңімпаз атанды.
Ясина Нұрболат,
Жәнібек ауданы
