Бүгін «Атамекен» өнер ордасында Қазақстан Республикасының энергетика вице-министрі Асхат Хасенов облыс тұрғындарымен кездесті. Басқосуға облыстық энергетика ТҮКШ басқармасының басшысы Мирас Мүлкай төрағалық етті.
Қазақстан Республикасы Президентінің 2022 жылғы 7 сәуірдегі № 863 Жарлығына сәйкес орталық атқарушы органдар басшылары халықпен кездесулер өткізуі тиіс. А. Хасенов отын-энергетикалық кешен саласында атқарылып жатқан жұмыс жөнінде баяндады. Бүгінде облыстың 99,8 пайызы газдандырылған. Тұрғындар үшін бөлшек саудадағы газ бағасы - 18,19 теңге/м3. Кездесуде қойылған сұрақтардың 90 пайызы электр қуаты тарифінің бағасына қатысты қойылды.
- Республика бойынша электр қуатын тарататын коммуналдық кәсіпорындардың тозығы жеткен. Жүктеме көбейсе, электр қуаты тапшы болады. Біз бұл мәселені жаңа стансалар салу арқылы шешуіміз керек. Тек стансаларды емес, электр жарығын тарататын желілерді де күтіп ұстауымыз қажет. «Жайықжылуқуат» АҚ-ның тозуы 80 пайыздан жоғары. «Батыс Қазақстан аймақтық электр желілік компаниясы» ЖШС-ның 20 мың шақырымнан асатын желісі 80 пайызға тозған. Олардың тұрақты жұмыс істеуі үшін бізге тарифті ақырындап көтеруге тура келеді. Біз бұдан қаша алмаймыз. Қазір тұрмыстық тұтынушылар үшін 1 кВт/сағ электр энергиясы ҚҚС есебінсіз 22 теңге. Кез келген кәсіпорын тарифті өсіруге ұсыныс білдіреді. Министрлік оның қаншалықты дұрыс, заңды екенін қарастырады, - деді вице-министр.
«Батыс Энергоресурстар» ЖШС электр энергиясына тарифті көтеруге өтінім берген еді.
- Бұл кәсіпорынның ұсынысы әлі де қарастырылуда. Жақын арада жауап береміз. Қазір біз тариф бағасының тез көтеріліп кетпеуі үшін мүмкіндігінше ұстап тұрамыз. Бірақ электр қуатымен үздіксіз қамтамасыз ету үшін тариф бағасы бәрібір кезең-кезеңмен көтеріледі, - деді А. Хасенов.
Кездесуден соң вице-министр тұрғындарды жеке сұрақтары бойынша қабылдады.
Мақаланың толық нұсқасын «Орал өңірі» газетінің алдағы санынан оқи аласыздар.
Айна Имашева
