Бүгін Казталов ауданы орталығындағы «Достық» саябағында еліміз бойынша бекітілген «Наурызнама» он күндігінің аясында «Ақбота» балабақша ұжымының ұйымдастыруымен киіз үй тігіліп, ұмытылып бара жатырған «Үме» дәстүрі насихатталды.
Халқымызда ұмыт болып бара жатқан ұлттық салт-дәстүрлеріміз де жоқ емес. Соның бірі – Үме дәстүрі.
Қырмандағы жұмыстардан сәл демалсын деп, ел болып жиналып ас береді. Үлкен, ауыр, көлемді жұмыстарды ауыл, ру адамдары «бір жеңнен қол шығарып» бас қосып, көпшілік болып, бірігіп атқарады. Әсіресе, қысқы мал азығы үшін жем-шөп дайындағанда мал иесі үмеге шақырады. Қарулы азаматтар орақтарын шыңдап, қайрап іске кіріседі. 20-30 жігіттер қатарласа тұрып, орақ тартады. Үмеге ет асаймыз деген бала-шағалар да, көңіл көтеретін әнші, күйшілер де келіп, өнер көрсетіп, жұрт бір серпіліп қалады. Кейде үлкен Үмелерде жігіттер күреске түсіп, қара жарыстар ұйымдастырған. Көмекке келгендерге берілетін ас «үме» деп аталған. Үме – ұжымдасқан еңбек тойы, мұндай істен ауыл адамдары шет қалмайды. Себебі қазақ халқы үме дәстүрін береке-бірліктің бастауы деп білген.
Балабақша ұжымы қойған керемет дәстүрді тамашалаған ауыл адамдарының үлкендері дастарханға бата беріп, мерекемен құттықтады. #nauryznamabqo
Гүлнұр Сәуірғалиқызы,
Казталов ауданы
