Мемлекет басшысының тапсырмасымен елімізде бастау алған "Таза Қазақстан" республикалық экологиялық акциясына Батыс Қазақстан инновациялық-технологиялық университетінің ұжымы да белсенді үлес қосуда. Бүгін оқу орнының студенттері өздері тұратын жатақханалардың аумағын қыстан қалған қоқыс-қалдықтан тазалады.
"Көп біріксе, күш" демекші, жалындаған жастар қолдарына кетпен, күрек алып, көтеріңкі көңіл-күймен айналаны мұнтаздай қылып жинап шықты. Отырғыштарды сырлап, жиектастарды әктеп, гүлсауыттарды әрледі. Аталмыш акцияның қоғамда экологиялық мәдениетті дамытуға, студент-жастарды туған өлке табиғатын аялауға шақырып, отансүйгіштікке тәрбиелеуге қосар үлесі орасан зор.
Өйткені туған жерге құрмет - қоршаған ортаға деген жанашырлықтан бастау алады. Экологиялық акция мамыр айының соңына дейін жалғасады. Мәселен, БҚИТУ жастары алдағы аптада акция ауқымын кеңейтіп, саябақтар мен гүлзарларға көшет отырғызу, гүл егу жұмыстарына атсалыспақ.
БҚИТУ баспасөз қызметі
