Шыңғырлау ауданында 100 жасаған қария, екі ғасырдың куәсі, ел ішінде «Қалаш ана» атанып кеткен Қалима Жұмабаеваның мерейлі тойы атап өтілді.
Мерейлі мерекеге аудан басшысы Мұрат Өмірәлиев қатысып, ғұмыры еңбекпен өткен қарт анаға облыс әкімі Нариман Төреғалиевтің атынан алғысхат табыс етті. Осынау мерейлі тойға арнайы облыс орталығынан келген БҚО ҚХА ақсақалдар кеңесінің төраға орынбасары Амангелді Дәулетжанов ақсақалдар кеңесі атынан құттықтау хат жолдап, «Елеулі еңбегі үшін» медалін, ал облыстық ардагерлер қоғамдық кеңесінің төрағасы Ержан Төлегенов «Батыс Қазақстан облысының құрметті ардагері» төсбелгісін тақты.
Аудан әкімі Мұрат Өмірәлиев мерейлі жас иесін құттықтап, өз атынан құттықтау хат ұсынды.
- Баршамыз үшін бұл күннің орны да, орайы да бөлек. Сіздер сұрапыл соғыстың соқпағынан өтіп, Отан деп от пен суға түстіңіздер, кең байтақ жерімізді қорғадыңыздар. Міне, содан бері талай ұрпақ жаңғырып, заман жаңарды. Сізді бүгінгі мерекеңізбен құттықтап зор денсаулық, ұзақ ғұмыр және өмірдің қызықтарын көре беруіңізді тілеймін, - делінген құттықтау хатта.
Бүгінде әз-Ана құрсағынан тараған бес баладан 11 немере, 21 шөбере, 2 шөпшек сүйіп отыр. Ғасыр жасаған әже балалаларымен барша аудан мақтанышына айналды.
Қаршыға Елемесов,
Шыңғырлау ауданы
zhaikpress.kz
