Елімізде білім берудің жаңа мазмұндағы жүйесін қалыптастырып, сол жаңашыл оқу үрдісін табысты ете алған білім мекемесінің бірі де бірегейі – Тасқала ауданы орталығындағы «Сәулет» мектеп-лицейі.
Лицей ұжымы жыл бойы оқуда, шығармашылық бағытта, спортта жетістікке жетіп, мектеп, ауданды айтпағанда, республикалық деңгейде облыстың намысын қорғап, жоғары көрсеткіш көрсеткен үздіктері бен байқаулардың жеңімпаздарын марапаттап, мадақтап тұрады.
Жыл сайынғы үздік дәстүрдің біріне айналған «Лицей балы – 2024» атты мерекелік іс-шара биыл да жоғары деңгейде өтті. Мерекелік іс-шараның алғашқы құттықтау сөзін мектеп директоры Аққаным Бисалиева алып, оқушыларға сәттілік тілеп, оқу жылында белсенділік танытқан ұл-қыздарға, білім нәрімен сусындатқан мұғалімдерге ризашылығын білдірді.
Республикалық деңгейде жетістікке жеткен және А. Тайманов атындағы «Ақ желкен» математикалық регатасының жеңімпаздары, 18-інші облыстық «Апельсин – 2023» физика-техникалық турнирінің «Үздік физик-эрудит», «Үздік физикэкспериментші» турларының жеңімпаздары мен жалпы білім беретін пәндер бойынша облыстық олимпиада және «Зерде» зерттеу жобасының, жалпы білім беретін пәндер бойынша республикалық ғылыми жобалардың жеңімпаздары мен «Сәулет» мектеп-лицейінің үздіктерін марапаттау осы білім ұясының негізін қалап, дамып-өркендеуіне зор үлесін қосқан ардагер ұстаз, Ы. Алтынсарин атындағы төсбелгінің иегері, білім беру ісінің құрметті қызметкері Бақтығұл Тасмағамбетов пен Күләш Шапиковаға, сондай-ақ мектеп директоры Аққаным Бисалиеваға бұйырды. Мектеп оқушылары адам өмірін жеңілдететін небір робот-машинаны, әр түрлі технологияны ойлап тауып жатса, енді кейбірі қолөнер, ән-күй, би жанрлары бойынша да өзінің шығармашылық қабілетін шыңдап, талай асудың биігіне шығып жүр.
Сол шығармашылық бағытта жетістікке жеткен оқушыларға Нұрболат Шапиков, Ғиният Шәкіров, Марина Суханова, Гүлнар, Сәуле Есеркеновалар марапаттарын табыстады.
Аудандық деңгейде жетістігі бар жеңімпаздарды ардагер ұстаз Қарлығаш Мырзағалиева мен Жанболат Айтжанов, Жеміс Ғұмарова, Айнұр Дүйсенова, Эльмира Шәкірова құттықтады.
«Оқуға құштар мектеп» жобасы аясында өзі кітап оқығанымен қоймай, ортасын да кітап оқуға шақырып жүрген белсенді оқырмандар мен «Біз кітап оқуға құштармыз» 20 минуттық кітап оқу жобасының жеңімпаз өрендерін марапаттау үшін сахнаға ардагер ұстаз Зәуреш Нұрғалиева және Бибигүл Күлшариева, Айғаным Бекентаева, Жақсат Бөлекбаев көтеріліп, игі тілегін білдірді.
Оқумен қатар спортты қатар алып, жарыстардың үздігі атанып жүрген оқушыларды спорт ардагері, қамқоршылық кеңестің төрағасы Қайыржан Баймағанбетов, дене шынықтыру пәні мұғалімдері Қайрат Нагиев пен Арнұр Дүйімбаев, Райымбек Жасанғалиев марапаттады.
Гүлмира Серікқалиқызы,
Тасқала ауданы
zhaikpress.kz
