16 маусым – Медицина қызметкерлерінің кәсіби мерекесіне орай «АMANAT» партиясы, Тасқала аудандық филиалының төрағасы, фракция жетекшісі, аудандық мәслихат депутаты Люция Жұбанышқалиева мен «Тасқала» БПҰ төрағасы, аудандық «Екпін» газетінің редакторы Назгүл Жәрдемова «Ардагерлерді ардақтайық» жобасы аясында аудан орталығындағы қос бірдей дәрігер Бекентаевтардың шаңырағында болып, мерекелерімен құттықтады.
Емен-жарқын әңгіме барысында отағасы өзінің еңбек жолына тоқталып, балалардың жазғы демалысын ұйымдастыру кезінде сол уақытта аудан әкімінің орынбасары болған Люция Әсетқызымен тығыз байланыста жұмыс істегенін тілге тиек етті.
Ал Бәтима Ғабдолқызы Тасқала ауданына жұмысқа қалай келгені жөнінде өз естелігімен бөлісті. Еңбек жолында адам жанына араша болып, өзіне артылған жауапкершілік жүгін сезіне білген ақ халатты абзал жан халықтың берген бағасынан асқан зор құрметтің жоқ екенін айтады.
Ауданда Бекентаевтар әулетін танымайтын адам жоқ. Әлі күнге дейін аудан экономикасының дамуына өз үлесін қосып келе жатқан, зейнеткерлікке шықсада жауапты істен қол үзбеген Жұмағали Бекентайұлы биыл 70 жасқа толмақ. Олар жөнінде алдағы уақытта аудандық газет бетінен оқитын боласыздар.
Назерке Шайхоллақызы,
Тасқала ауданы
