«Биыл бірінші сыныпқа өтініш қабылдау 1 сәуірде басталып, 2024 жылдың 31 тамызына дейін жалғасады»,- деп, ҚР Оқу-ағарту министрлігі хабарлаған еді. Ата-аналар баланың құжаттарын электрондық үкіметтің веб-порталы арқылы тапсыра алады.
Жаңа оқу жылында бірінші сыныпқа 370 мыңнан астам бала барады деп күтілуде.
- «Қазақстан Республикасының кейбір заңнамалық актілеріне білім беру, тәлімгерлік және балалардың қауіпсіздігі мәселелері жөніндегі Заңына сәйкес лицейлер мен гимназияларға бірінші сыныпқа қабылдау кезінде емтихан өткізуге тыйым салатын ереже енгізілді. Барлық балалар, дайындық деңгейіне қарамастан, тең мүмкіндіктерге ие болады. Бұл бастама тестілеу мен әңгімелесуге байланысты бірінші сынып оқушыларындағы психологиялық қысымды азайтуға бағытталған»,- деп атап өтті орта білім Комитетінің басқарма басшысы Әлия Чокушева. Балалар бірінші сыныпқа алты жастан бастап ата - анасы немесе заңды өкілінің өтініші негізінде қабылданады. Өтінішпен бірге №065у формасындағы денсаулық жағдайы туралы анықтама, 026/у-3 баланың денсаулық паспорты және баланың екі дана 3х4 фотосуреті болу керек. Өтініш демалыс және мереке күндерді қоспағанда, дүйсенбіден жұмаға дейін қабылданады.
Теректілік көпбалалы ана Ұлжан Мұханбетиярова да баласын мектепке оңай тіркепті.
- Үшінші ұлым Омар Серікті Федоровка жалпы орта білім беретін мектебіне тіркедім. Халыққа қызмет көрсету орталығына барып, сондағы мамандар көмегімен eGov.kz қосымшасы арқылы тіркеп, мектепке құжаттарын тапсырдым, - дейді ата-ана.
Жауһар Нұрым,
Теректі ауданы,
zhaikpress.kz
