Казталов ауданына қарасты Тереңкөл ауылдық округі аумағындағы «Uniserv» ЖШС жол құрылыс компаниясының базасында құрылысшылар күніне арналған спорттық жарыстар өтті.
Аудандық «Айбын» спорт клубының қолдауымен өткен жарыста «Uniserv» компаниясында қызмет жасайтын жолшылар сайысты.
Айта кету керек, «Uniserv» компаниясын Казталов—Жәнібек—Бөкей ордасы бағытындағы күре жол мен Казталов—Беспішен—Қошанкөл—Қараоба бағытындағы жол құрылысын жүргізіп жатыр.
Жолшылар айтулы күні доп тебу, қол күресі, гір тасын көтеру, жерден көтерілу (отжимание), арқан тарту сынды спорт түрлерінен бақ сынады.
Тартысты өткен жарыс нәтижесінде жүлделі орын алған спортшыларға компания атынан бағалы сыйлықтар табысталды. Шара соңы мерекелік концертке ұласты.
Қайрат Жақып
Казталов ауданы
