Махамбет Өтемісов атындағы Батыс Қазақстан университетінің доценті, филология ғылымдарының кандидаты Зинолла Мүтиев жұмыс сапарымен М.Ақмолла атындағы БМПУ-ға барды. Бұл туралы БҚУ-дың баспасөз қызметі хабарлады.
Суреттер: БҚУ-дың баспасөз қызметі
Сапардың мақсаты – М.Ақмолла атындағы Башқұрт мемлекеттік педагогикалық университеті кітапханасының базасында Орал өңірі ақын-жазушыларының әдеби мұрасын терең зерттеу, сондай-ақ ресейлік әріптестермен тәжірибе алмасу болды.
Қазақстан мен Башқұртстан арасындағы әдеби байланыстарға ерекше назар аударылды. Зинолла Жақсылықұлы Орал-Каспий өңірін қамтитын гранттық жоба шеңберінде өз зерттеулерін ұсынды және болашақ ғылыми еңбектеріне енетін БМПУ кітапханасы қорының материалдарын зерттеуге қызығушылық білдірді.
Сондай-ақ БҚУ студенттеріне БМПУ-да тағылымдамадан өту туралы ұсыныс талқыланып, университет кітапханасына «Әдеби өлкетану: қоғамдық сананы жаңғырту» хрестоматиясының томдары тарту етілді.
