Бүгін Орал қаласында орналасқан Ұлттық ұланның 5517 әскери бөлім жеке құрамымен "Конституция – кемелдік кепілі" атты патриоттық кеш өтті.
Бұл шара Х.Есенжанов атындағы облыстық балалар және жасөспірімдер кітапханасы және қалалық мәдени ағарту бірлестігіне қарасты "Әйгерім", "Гүлдәурен" балалар аула клубымен бірлесіп өткізілді. Шара барысында "Ел ардағы – Ата заң" бейнеүзік көрсетілді. Кітапхананың бөлім басшысы Бибігүл Айтқалиқызы "Конституция – кемелдік кепілі" атты кітап көрмесін таныстырды.
Шара барысында жас өнерпаздар, әскери бөлімнің сарбаздары өз өнерлерін көрсетті. Патриоттық кеш барысында тәрбие бөлімшесінің аға офицері майор Алмагүл Жұмабекова, ҚР Конституциясы – мемлекет негізінің іргетасы екенін, тәуелсіздіктің басты құндылығы – Ата заңымызды қадірлей алатын, білімі терең, парасатты, егемендігімізді одан әрі баянды ететін жастарды тәрбиелеу, мемлекеттік рәміздерімізді қастерлеу, Отанға деген сүйіспеншілікті орнату – басты міндетіміз екенін атап көрсетті.
Іс-шараны қортындылай келе, әскери бөлім сарбаздары кітапхана ұжымына және аула клубы тәрбиеленушілеріне зор алғыстарын білдіріп, бөлім басшылығы атынан мадақтамалар табыстады.
ҚР ҰҰ «Батыс» өңірлік қолбасшылығының баспасөз қызметі
