Аудандық мәдениет үйінде «Ұстаз деген жарық күні ғаламның» атты ұстаздар күніне арналған концерт өтті. Оған Бөкей ордасы ауданы әкімі Нұрлыбек Даумов қатысып, білім саласында аянбай еңбек еткен барша ұстаздар қауымын кәсіби мерекемен құттықтады.
– Құрметті ұстаздар, білім беру саласының ардагерлері. Ұстаз – білім беретін мамандық иесі ғана емес, ол елдің ертеңгі тізгінін ұстайтын ұрпақты тәрбиелеуші. Мектептің жүрегі де, басты тұлғасы да - мұғалімдер. Шәкірттерін білім нәрімен сусындатып, тәлім-тәрбие беру, жақсы қасиеттерді бойларына дарытуда мұғалімдердің еңбегі өлшеусіз. Қиын да маңызды міндетті атқарып жүрген ұстаздарымызға барлық адам құрметпен бас иеді, - деген Нұрлыбек Жасқайратұлы білім саласында жеткен жетістіктермен де бөлісті.
Мереке күні қошеметке бөленген ұстаздардың бірқатары сахнаға көтеріліп, салтанатты жағдайда марапаттарға ие болды.
Еңбегімен еленген бірқатар ұстаздарды, атап жазар болсақ, Тәуелсіз Қазақстанның рухани және әлеуметтік дамуы жолында қол жеткен табыстары және оның гүлденуіне қосқан зор үлесі үшін ҚР оқу-ағарту минстрлігінің Құрмет грамотасына Бөкей ордасы колледжінің директоры Бағдат Лұқпанов ие болды.
ҚР оқу-ағарту минстрлігінің алғысхатымен Жаңылсын Құбышева, Қарлығаш Мырзабаева, Рафаэль Денгізбаев, Салтанат Сарбаева т.б мұғалімдер марапатталды. Облыс басшысы Нариман Төреғалиевтің алғысхаты Жәңгірхан атындағы мектеп директорының оқу ісі жөніндегі орынбасары Талшын Сансызбаеваға ұсынылды.
Бұдан соң аудандық білім беру бөлімінің басшысы Нұргүл Омарова, ардагер ұстаздар ұйымының төрайымы Няйлягүл Нарболова, «Аманат» партиясы аудандық филиалының кеңесші маманы Тамерлан Зауров, аудандық білім беру бөлімі кәсіподақ ұйымының төрағасы Нұржан Сариевтер де облыстық білім басқармасының т.б атынан осы салада жемісті қызмет етіп жүрген бірқатар ұстаздарды марапаттады.
Арайлым Есмағұлова,
Бөкей ордасы ауданы
