Батысқазақстандық туристер ел чемпионатында топ жарды

Жуырда Түркістан облысында спорттық туризмнен (аралас туризм) Қазақстан Республикасының чемпионаты өтті. Жарысқа еліміздің 9 өңірінен 21 команда қатысты. Олардың қатарында Батыс Қазақстан облысының құрама командасы да болды.

Іс-шараның мақсаты – спорттық туризмді дамыту, табиғи кедергілерден қауіпсіз өтудің дағдыларын қалыптастыру. Жарыста балалар, жасөспірімдер және ересектер маршруттар бойынша кедергілер мен әр санаттағы асулардан өтіп, сынға түсті. Мәселен, біріншісі, «Техникалық» қашықтық деп аталды. Онда төрт (соның ішінде 1 қыз бала) спортшыдан тұратын команда судан және қиғаш тартылған аспалы өткелдерден өтіп, туристік кедергілерді еңсерді. «Байлам» қашықтығында екі спортшы жылдамдықты ескере, қа­уіпсіздікті сақтай отырып, табиғи жартасқа мініп, арқан арқылы одан түсті. Содан соң жартасқа мініп, қиғаш тартылған үш қатарлы аспалы өткелден өтті. «Құтқару жұмыстары» бөлімінде төрт қатысушыдан құралған команда берілген оқиға желісі бойынша тау үстіндегі зардап шегушіні арқан арқылы түсіріп, оны қайта жоғары­ға көтерді. «Мәнерлеп жүру» және «Туристік кедергілер» қашықтығында байқау қатысушылары велосипедпен жарысты. Олар шеңбер, конус, лабиринт, сегіздік, затты тасымалдау, қисық жол, қақпа, қиғаш тақтай, жіңішке тақтай және т. б. кедергілерден жылдам өтуі керек болды.

Осындай спорттық-туризм бағытындағы жарыстан облыс құрама командасы әр жас ерекшеліктері бойынша топтың алдында жүрді.

Мәселен, «Байлам» қашықтығында ересектер тобында Кәрім Неталиев пен Нұргүл Аманкелдиева және Ерлан Неғметов пен Темірлан Кенжемұрат  І орын жеңіп алса, жасөс­пі­рімдер арасында Әмірхан Жәңгірханұлы мен Темірлан Асылбек және Бекбарыс Қасымғали мен Гүлизар Жұма­ғалиева топ жарды. Осы қашықтықта балалар тобы бойынша Бахтияр Алипов пен Әлімжан Қайырғалиев және Айша Асқар мен Айару Оразалы, сондай-ақ Әлібек Серік пен Әлімжан Қайырғалиев ІІ орынды еншіледі. Осылайша жалпыкомандалық есепте БҚО командасы үздік шығып, І орынды жеңіп алды.

Аталмыш жарыста жылдық есеп негізінде үздік спортшылар марапатталды. Олардың қатарында батысқазақ­стандық Кәрім Неталиев, Темірлан Кен­жемұрат, Ерлан Неғметов, Нұргүл Аманкелдиева, Гүлизар Жұ­мағалиева, Гүлмира Ерғали, Ай­ша Асқар және Айару Оразалы бар.

Гүлсезім Бияшева

zhaikpress.kz