Жаңабұлақ ауылында самбо, дзюдо және қазақ күресінен ҚР бірнеше дүркін чемпионы, дзюдодан КСРО спорт шебері, 55 жасында өмірден озған Төлеуғали Бекеевті еске алуға арналған турнир өтті.
Еркін күрестен 2015-2016 жылы туған балғын балуандар төрт салмақ дәрежесінде боз кілемде өзара мықтыны анықтаса, аудан спортшылары түйе палуан, жаңабұлақтықтар өгіз палуан атағын жеңіп алу үшін белдесті.
Мәдениет үйінде өткен турнирдің ашылу салтанатында округ әкімі Жамбыл Дыбысқалиев ауыл спортының дамуында сүбелі ізі қалған жерлес спортшының рухына құрмет көрсетіп, жан-жақты қолдаған ауылдастары мен марқұмның замандастарына зор алғысын арнап, қатысушыларға сәттілік тіледі. Сахна төріне Т.Бекеевтің жанұясы, артынан ерген ұрпағы шақырылып, спортшының жары Райса Бекееваға ел атынан естелік сыйлық тапсырылды. Шараның бас демеушісі – жеке кәсіпкер Әлібек Серікқали мен Т.Бекеевтің жанұясы. Солардың атынан спортшының ұлы Данат Төлеуғалиұлы сөз сөйледі.
Алдымен боз кілемге балғын балуандар шықты. Жеңісті қолдан бермеуге тырысқан спортшылардың әр айласы, аяқ астынан ұтымды пайдаланған әдісін қолдаған зал толы жанкүйерлердің эмоциясын айтсаңыз. Әсіресе түйе палуанға таласқан жүректі ерлердің күресі әсерлі өткенін айта кету керек.
Жарыс қорытындысында еркін күрестен 24 келі салмақ дәрежесінде Медет Бейбарыс, 28 келіде Бақкелді Хасен, 32 келіде Ерқанат Жәрдем, 45 келі салмақ дәрежесінде Ислам Ринат жеңімпаз атанды. Чапаевтық Еркебұлан Беляков түйе палуан, ал Жанболат Шайдуллиев өгіз палуан атағын жеңіп алды. Оларға демеушілер тағайындаған Түркия еліне жолдама мен ақшалай сыйлық табысталды. Жеңіс тұғырына көтерілген өзге де спортшылар қаржылай қолдауға ие болып, дипломдармен марапатталды. Спортты жанына серік еткен жас палуандарға спорт ардагері Ират Қырықбаев ақ батасын берді.
Осы күні Т.Бекеевтің рухына бағышталып, құран оқылып, ас берілді.
Әсел САҒЫН,
Ақжайық ауаны
