Ауыл шаруашылығы – азаматтарымыздың өмір сапасына тікелей әсер ететін экономиканың басты салаларының бірі. Аталған салада төгілген тер мен тынымсыз еңбектің арқасында бүгінде отандық аграрлық сектор көз алдымызда нық дамып келеді. Аудандық мәдениет үйінде ауыл шаруашылығы қызметкерлерінің кәсіби мерекесіне орай салтанатты шара ұйымдастырылды. Негізінен аталмыш мерекенің маңызы өте зор. Елімізде еңбек ететін, мал шаруашылығымен айналысатын, азық-түлік өнеркәсібінде жұмыс істейтін, өңірімізді азық-түлікпен қамтамасыз етіп жүрген жандардың еңбегінің еленетін күні. Халықтың әл-ауқаты мен өмір сапасының жақсы болуы ауыл шаруашылығымен тығыз байланысты. Ауданда мал шаруашылығы мен егін шаруашылығы саласында жеткен жоғары жетістіктер де жоқ емес. Жиын басында сөз алған аудан әкімінің орынбасары Мирболат Бисенов осы жолда ерен еңбек атқарып, халық игілігін көздеп, ел әлеуетін арттыруға сүбелі үлес қосып жүрген ауыл шаруашылығы саласының қызметкерлерін кәсіби мерекелерімен құттықтап, бірқатар азаматтарға марапаттар табыс етті.
Соның ішінде, Қазақстанның «Құрметті мал дәрігері» төсбелгісі және І дәрежелі дипломмен Борсы ауылдық округі ветеринариялық пунктінің меңгерушісі Бисенғали Үмітаев, ІІ дәрежелі «Еңбек даңқы» төсбелгісімен Жақсыбай ауылдық округі «Саят» шаруа қожалығының жетекшісі Рахметолла Насенов марапатталды. Ауыл шаруашылығы қызметкерлері салалық кәсіптік одағының «Елеулі еңбегі үшін» медалі Күйгенкөл ауылдық округі «Мұрат» шаруа қожалығының жетекшісі Талғат Есқалиев, Ақоба ауылдық округі «Абдраман» шаруа қожалығының жетекшісі Айбек Әбдіров, Тау ауылдық округі «Рушан» шаруа қожалығының жетекшісі Берік Тұяқов, Талов ауылдық округі «Шмит» шаруа қожалығының жетекшісі Мирхат Кенжеғалиев, Борсы ауылдық округі «Тыныштық» шаруа қожалығының жетекшісі Берік Бекқалиев, Ақоба ауылдық округі «Шеркеш» шаруа қожалығының жетекшісі Асқар Бисеновке табысталды.
БҚО ауыл шаруашылығы басқармасының алғысхатын Тау ауылдық округі «Сұңқар» шаруа қожалығының жетекшісі Таңат Сәриев, Ұзынкөл ауылдық округі «Нұрберген» шаруа қожалығының жетекшісі Есберген Ажығалиев, Жақсыбай ауылдық округі жеке тұрғындар малының бақташысы Нұрбек Сейтқалиев алған болса, Тау ауылы «Дидар» шаруа қожалығының жетекшісі Қанат Нығметов, Борсы ауылдық округі жеке тұрғындар малының бақташысы Қадырхан Бакишев, Тау ауылдық округі жеке тұрғындар малының бақташысы Самат Хамиев аудан әкімі Тимур Шиниязовтың алғыс хатына ие болды.
Сонымен қатар ауыл шаруашылығы саласы бойынша аудан үздіктері анықталды. «Үздік бақташы» аталымына Тау ауылдық округі жеке тұрғындар малының бақташысы Марат Хамиев, «Үздік шопан» аталымына Ақоба ауылдық округі «Шафхат» шаруа қожалығының жетекшісі Тайфур Даутов, «Үздік жылқышы» аталымына Ақоба ауылдық округі «Ефрем» шаруа қожалығының жылқысышы Мирлан Ефремов, «Үздік механизатор» аталымына М.Ықсанов атындағы Жәнібек колледжінің механизаторы Мақсат Усманов, «Үздік ветеринар» аталымына Жәнібек ауылдық округі ветеринариялық пунктінің меңгерушісі Бекболат Сыдихов лайық деп танылды. Ауыл шаруашылығы саласының ардагері – Ақоба ауылдық округі «Азырхан» шаруа қожалығының жетекшісі Азырхан Мұхамбетқалиев те үздіктермен бірге марапатталды.
«Ауыл шаруашылығы өнімінің үздік экспорттаушысы» болып Тау ауылдық округі «Армат» шаруа қожалығының жетекшісі Мухаммадияр Сариев, «Цифрландыру әдісін меңгерген үздік шаруашылық» аталымымен Талов ауылдық округі «Рамзан» шаруа қожалығының жетекшісі Бектұрған Досқалиев, «Ауданның ауыл шаруашығы саласының үздік инвесторы» аталымымен Қамысты ауылдық округі «Кенхан» шаруа қожалығының жетекшісі Асылбек Сейітқалиев марапатталса, «Ауыл шаруашылығы саласының үздігі» деп Жақсыбай ауылдық округі «Байсал» шаруа қожалығының жетекшісі Тұрсын Осатов танылды. Марапат иелері Мирболат Бауыржанұлымен естелік суретке түсіп, шара әрмен қарай аудан көркемөнерпаздарының концерттік бағдарламасымен жалғасын тапты.
Арай Сейфолла
Жәнібек ауданы
