Бүгін Жаңақала аудандық мәдени-демалыс орталығы жанынан құрылған үйірмелердің «Самға, жұлдыз, самғай бер биіктерге» атты жылдық есеп беру концерті өтті. ЛЭД экраннан үйірмелердің өткізілу барысы мен алған жүлделері бейнешолу арқылы көрсетілді.
Алғашқы сөз аудандық мәдениет, тілдерді дамыту және спорт бөлімінің басшысы Ақнұрлы Нұрғалиқызына ұсынылып, Қазақстан Кәсіподақтар күніне орай мерекелік марапаттарды табыс етті. Қазақстанның Кәсіподақтар күніне орай Қазақстандық салалық мәдениет, спорт, туризм және ақпарат қызметкерлерінің кәсіптік одағы қоғамдық бірлестігінің «Еңбек даңқы» төсбелгісімен Қуанышбек Айдарбеков, аталмыш қоғамдық бірлестігінің құрмет грамотасымен Мерей Жұмашев, Анита Қанатова марапатталса, Махамбет Нұрахметов пен Азамат Маратқа Батыс Қазақстан облыстық филиалының алғысхаты табыс етілді.
Бұл кеш осы жылдың шығармашылық қорытындысы. Түрлі салада өнерін шыңдап жүрген бүлдіршіндер мен олардың жетекшілерінің жетістікке жетіп, биік белестерді бағындырып жүргенін көз көріп, құлақ естіп жүр. Өнерпаздар қазақтың төл аспабының күмбірімен шанағынан сыр ақтарып, сахна өнерінде ерекше қошеметке ие – би өнерінде буыны биге екемделген бір топ бишілердің мың бұралғанын көріп, жиналған көрермен шапалақтарын аямады.
Сонымен қатар, шағала шабытымен жыр жазып, самал үнімен ән шырқаған жастар да ортамыздан табылды. Даралығы мен даналығы теңдескен сахна төрінде өздерін еркін ұстаған жарқын жұлдыздардың сазды кеші «Отаным Қазақстаным» әнімен аяқталды.
Ақерке Ғилымхан
Жаңақала ауданы
