Бүгін Жаңақала колледжінде «Студенттік өмір – игі өмірдің бастауы» атты мерекелік шара өтті.
Сазды кеш барысында сөз алған аудандық жастармен жұмыс жөніндегі ресурстық орталығының басшысы Дәурен Мерешов барша студенттерге ізгі лебізін жолдады.
Әрі қарай биылғы жылы қабылдаудан өтіп, мектеп қабырғасынан колледжге ауысқан бір топ жеткіншектерге аталмыш білім ордасының директоры Самат Ермекқалиев студенттік кітапшаларын табыс етті.
Жыл бойына өз қабілеттерін шыңдай білген студенттер де үздік деп танылып, түрлі бағамда марапаттар ұсынылды. Сонымен қатар «Жыл студенті – 2024» бағамын жеңіп алған Айнара Сүюғалиқызын ортаға шақырып, естен кетпес студенттік өмірде жеткен жетістіктері мен оқу үлгеріміне тоқтала кетті.
Жарқын жұлдыз Айнара – «Жас талант – 2024» шығармашылық фестивалінің «Кавер» бағыты бойынша жүлделі 1 орынға ие болған колледж мақтанышы.
Шағала дауысымен ән шырқаған Айнара Шакираттан жолдастары да, ұстаздары да көп үміт күтеді. Халық ақыны Нұрпейіс Байғанин «Білімнен қымбат нәрсе жоқ, Көңілде жатса баспай тот» деп жырлағандай, студенттік өмірдің әр күні естен кетпес ерекше сәттер, өнегелікпен ұштасатын білім нәрі де бағалауды қажет ететін құндылық.
Кеш соңында колледж ұжымы мерекелік шараға демеушілік танытқан «Жан-демеуші» қоғамдық бірлестігіне өз алғыстарын білдірді.
Ақерке Ғилымхан
Жаңақала ауданы
