«Нарын шуағы» әйелдер қоғамдық бірлестігінің ұйымдастыруымен білімді де жан-жақты қыз-келіншектердің арасында «TezTapQuiz» атты интеллектуалдық сайыс өтті.
Бұл сайысқа әр түрлі мекемеден 10 команда сынға түсті. Қатысушылар сұрақтарға тапқырлықпен тез әрі шапшаң жауап беруден бөлек, логикамен де сыналды. Екі сағатқа созылған ой жарысында бас-аяғы 80 сұрақ қойылды.
Нәзікжандылар ғана бас қосқан интеллектуалдық шара алғаш рет өткізіліп отырғанын айта кетелік. Бірлестіктің тырнақалды жобасына аудандық мәслихаттың төрағасы Лариса Қайырғалиева да арнайы келіп, сәтті де тартысты ойын тіледі
- Бұл жарыс - ойы ұшқырлардың бас қосатын бірден-бір ортасы. Алдағы уақытта да зияткерлік сайыстарға қатысып, білімдерін дәлелдеп, таным-көкжиектерін кеңейтіп, уақыттарын тиімді өткізуге ұмтылған жандардың қатары көбейсін,- деді.
- «TezTapQuiz»жобасының басты мақсаты сайқындық қыз-келіншектердің арасында интеллектуал ортаны қалыптастыруды көздейді. Әзірге тек он команданы ғана сайысқа қостық. Куиз ойындарын өткізу үшін де тәжірибе жинап, кем-кетігін ескеріп, дұрыс әрі қызықты, логикаға құралған сауалдарды сауатты таңдай білу маңызды, - деген бірлестік жетекшісі аталмыш ойынның ережесімен таныстырды
Айта кетелік, «Оңай олжа», «Логик тайм», «Суреттер сөйлесін», «Бәс тік» атты төрт кезеңнен тұрды.
Әр кезең бойынша да асығы алшысынан түсіп, жоғары ұпайларға ие болған бес команда, яғни, М-С.Бабажанов мектебі атыннан сынға түскен «Ұлағат» командасы, аудандық мәдениет үйінен «Сырғалым», аудандық балалар кітапханасынан «Тұмар», аудандық балалар-жасөспірімдер туризмі және экология орталығынан «Шұғыла», аудандық саз мектебінен «Қазына» командалары супер ойынға жолдама алды. Ал, аудандық аурухананың атынан шыққан «Авиценна», аудандық жұмыспен қамту және әлеуметтік бағдарламалар бөлімінен «Энергия», М.Мәметова мектебінен «Жұлдыз», «Ертөстік» балабақшасының атынан «Фортуна», аудан әкімдігінің атынан «Бірлік» командалары ерекше белсенділік танытқандары үшін алғысхаттармен марапатталды.
Супер ойынға жолдама алған командалар енді үлкен бәйгеде сынға түсіп, өзара жеңімпазды анықтайтын болады.
Нұрай Таубай
Бөкей ордасы ауданы
