Бүгін Сырымда ауыл шаруашылығы, тамақ және өңдеу өнеркәсібі қызметкерлері күні кәсіби мерекесіне орай «Еңбек — елдің берекесі» атты салтанатты шара өтті.
Мәдениет үйінің фойесіне ауданда өндірілген ауыл шаруашылығы өнімдерінің көрмесі қойылды.
Іс-шарада аудан әкімі Жұмагелді Батырниязов сөз сөйлеп, ауданның ауыл шаруашылығы саласындағы жеткен жетістіктерін саралап, кәсіби мереке иелерін құттықтап, ізгі лебізін білдірді.
Аудан басшысы ҚР Ауыл шаруашылығы министрлігінің «Еңбек ардагері» медалін ауданға осы салада еңбегі сіңген Қамидолла Қаржауов, «Бөлекқұмақ» ШҚ жетекшісі Талап Рысовтың өңіріне тақты.
Ауыл шаруашылығы қызметкерлері кәсіподағының «ІІ дәрежелі «Еңбек даңқы» төсбелгісімен «Балауса» ШҚ жетекшісі Абылай Бисенғалиев, «Елеулі еңбегі үшін» медалімен «Досымхан» ШҚ жетекшісі Еділ Масалимов, «Кәрім» ШҚ жетекшісі Мирболат Каримов марапатталды.
Батыс Қазақстан облысы әкімінің алғыс хаты «Миллат» ШҚ жетекшісі Миллат Қадралин, «Бұлан» ШҚ жетекшісі Махамбет Досалиевке табыс етілді.
Ауылшаруашылығына еңбегі сіңген ерлер облыстық ауыл шаруашылығы басқармасының, ветеринария басқармасының, Сырым ауданы әкімінің алғысхатына ие болды.
Ауыл шаруашылығы саласындағы үздік мамандар да анықталып, мереке күні құрметке бөленді. Бердес Төлегенов «Жер қатынастары саласындағы ең тәжірибелі маман», Замира Қорғамбаева «Ветеринария саласындағы ең тәжірибелі маман», Мейрамбек Мамбетияров «Жыл инновациясы», Мереке Меңжанов «Ауыл аманаты» бағдарламасындағы үздік жоба», «Талдыбұлақ Сүт» АШӨК «Үздік ауылшаруашылығы кооперативі», Айбек Халықов «Үздік жас фермер», Самат Мұханбетжанов «Үздік бақташы», Ғаділ Масалимов «Үздік шопан», Салауат Сапиев «Үздік жылқышы», Мерхат Мұхамбетияров «Үздік механизатор» аталымдарына ие болды.
«Қазақстан Фермерлерінің қауымдастығы» заңды тұлғалардың және жеке кәсіпкерлер қауымдастық нысанындағы бірлестігінің төрағасы Серік Жонисов «Үздік фермер» төсбелгісімен «Тоқмырза» ШҚ жетекшісі Әлібек Зейновті, қауымдастықтың «Құрмет грамотасымен» «Бегім» ШҚ жетекшісі Темірғали Бегімовты марапаттады.
Салтанатты шара аудан көркемөнерпаздарының сазды сәлемімен жалғасты.
Шынар Молданиязова
Сырым ауданы
