БҚО әкімінің орынбасары Қайыржан Меңдіғалиев Бөкей ордасы ауданына іс-сапармен келді.
Естеріңізге сала кетсек, Қайыржан Меңдіғалиев ішкі саясат, білім, мәдениет, спорт, дін салаларының мәселелері бойынша жетекшілік етеді. Елдің тыныс-тіршілігімен танысу мақсатымен оңтүстік аудандарға арнайы ат басын бұрған орынбасардың сапары Жәнібек ауданынан басталып, Хан ордасы, Сайқын ауылдарында жалғасты.
Қайыржан Меңдіғалиев алдымен Жәңгір хан, М-С.Бабажанов, Дәулеткерей кесенелеріне тәу етіп, кейін Хан ордасы музей-қорығының жұмысымен танысты. Одан әрі жөндеуден кейін жаңарған мәдениет үйінде болып, осы ғимаратта орналасқан, қазіргі күні заманауи негізде жаңарту жұмыстары жүргізіліп жатырған ауылдық кітапхананың жағдайынан хабардар болды.
Аудан әкімі Нұрлыбек Даумов ауылдағы балалар спорт мектебі жай-күйімен таныстырып, іргелі ауыл үшін мектеп ғимаратының тарлық ететінін айтып өтті.
Ермекұлының елге сапары Сайқын ауылында жалғасты. Мұнда ол аудандық орталық кітапханада болып, кітапханашылардың базынасына құлақ түрді.
– Ауылдық округі бар, елдімекені бар, жалпы алғанда аудан бойынша 22 кітапхана жұмыс жасайды. Үш үлкен округіміздегі кітапханамыз модернизация бағдарламасы бойынша жұмыстары заманауи үлгідегі стандарт бойынша жалғасуда. Кітап қоры, жиһаздарына дейін жаңартылды, талаптары да баршылық. Қолымыздан келгенше талаптан шығуға тырысып бағудамыз. Өзіңіз де көріп отырсыз, ғимаратымыз ескі, тар. Оқырман залы деген аты ғана, кітапханашымызды қосқанда төрт адам әрең сыяды. Бір шара өткізетін болсақ, «Достық» үйіне, мәдени демалыс орталығына көшіп-қонып жүреміз, - деді орталықтандырылған кітапханалар жүйесінің директоры Нүркен Сабиров.
– Қабырғасы сөгіліп, еңсесі түскен аласа ғимараттың жағдайын көріп тұрсыз ғой. Қанша күрделі жөндеу жүргізсе де, жаба тоқып, жасыруға келмейтіні анық. Аудан орталығына заманауи жақсы бір ғимарат салсақ, артық болмас еді, - деп аудан басшысы Нұрлыбек Даумов та қоштай сөйледі.
Өз кезегінде облыс әкімінің орынбасары Қайыржан Меңдіғалиев ұсыныстардың орынды екенін айтып, мәселені облыстық деңгейде қарастыратынын айтып, сендірді.
Ұлпан Әнуарқызы
Бөкей ордасы ауданы
