Теректі ауданының намысын, өңір абыройын, елдің атын қорғап жүрген дарындарды Теректі ауданының әкімі Әлия Мұханбетжанова әрдайым елеп-ескеруді, оларды қолдауды ұмыт қалдырмайды.
Бұл сөзімізге дәлел де, дәйек те жетерлік. Бір ғана «Телқоңыр» ансамблінің додаларға алаңсыз барып, жүлдемен оралуы, байқауларға мығым дайындалып, еш кедергісіз шет елдерге сапарлатуы қолдау емей, немене?!
Міне, Әлия Биғазықызы Мәскеуде өткен халықаралық «Jas tolqyn» жас таланттар конкурсының жеңімпазы атанған «Телқоңыр» ансамблін қабылдап, мерейді үстем еткен жеңістерімен құттықтады.
Бұл ортадан аудандық білім беру бөлімінің басшысы Мирас Сапарғалиев һәм аудандық саз мектебінің директоры Азамат Қалиев те табылды.
Иә, бұл – исі қазақ үшін ортақ қуаныш! Ансамбль жетекшісі Дәурен Жұмағалиев аталған байқау туралы толығырақ тарқатып, әлемнің түкпір-түкпірінен жиналған қатысушылармен бір сахнада өнер көрсеткендегі жас таланттардың әсерін жеткізді.
Айта кету керек, аудан басшысы «Телқоңырдың» байқаудың республикалық деңгейінде бас жүлдені қанжығаға байлаған уақытында қабылдап, қандай қолдау керектігін сұраған еді. Сонда жас дәстүрлі әншілерге сахналық киімнің қажеттілігі туралы сөз болды.
Әлия Мұханбетжанова мұны дереу қолға алып, «Мәскеуге жаңа киіммен барасыздар» деген уәдесін берді. Айтқандай, олар халықаралық байқауда аудан әкімінің қолдауы арқасында жаңа киіммен өнер көрсетті.
Қабылдау соңында аудан басшысы ансамбль мүшелеріне алғысхат табыстап, естелік сыйлық ұсынды.
Ақтілек Әлібекұлы,
Теректі ауданы
