Шыңғырлау аудандық дене шынықтыру-сауықтыру кешенінде білім беру үздігі, ұлағатты ұстаз, білікті бапкер Қази Серғалиұлын еске алуға арналған грек-рим күресінен 2011-2012 жылы туған және 2013-2014 жылы туған кіші жасөспірімдер арасында облыстық ашық турнир өтті.
Көршілес облыстардан, аудандардан келген 12 команда, жалпы 220-дан астам жас спортшы 16 түрлі салмақ дәрежесінде бақ сынады.
Турнирдің ашылу салтанатында аудан әкімі Мұрат Өмірәлиев, Бөрлі ауданының еркін және грек-рим күресінің федерациясы президенті Орынбасар Кушев, ардагерлер арасында әлемнің 9 дүркін күміс жүлдегері Нариман Қайырманов, №1 Олимпиадалық резервтің мамандандырылған балалар мен жасөспірімдер мектебі директоры, 2009 жылғы жастар арасында Азия және Әлем чемпионы, халықаралық дәрежедегі спорт шебері Артур Үмбетқалиев, грек-рим және еркін күрес федерациясы Батыс Қазақстан қоғамдық бірлестігінің президенті Төлеген Досболатов және ауданның спорт ардагерлері, бөлім, мекеме басшылары қонақ болды.
Аудан әкімі Мұрат Өмірәлиев құттықтау сөз сөйлеп, барша спортшыларға сәттілік тіледі. Ел мақтаныштарын ұмытпай, дәріптеп жүру, спортты насихаттау, мәртебесін көтеру ең басты мақсат екенін жеткізді.
Сондай-ақ осындай ауқымды турнирлердің республикалық деңгейде өтуіне бірлесе ат салысу керектігін айтып, жас спортшыларды жігерлендіре түсті. Алғы сөзінен кейін аудан басшысы спорт ардагері, әлемнің 9 дүркін күміс жүлдегері Нариман Қайырмановқа алғысын білдіріп, ізгілік көрсетіп шапан жапты.
№1 Олимпиадалық резервтің мамандандырылған балалар мен жасөспірімдер мектебі директоры, 2009 жылғы жастар арасында Азия және әлем чемпион, халықаралық дәрежедегі спорт шебері Артур Үмбетқалиев те құттықтау сөз сөйлеп, аудандық балалар жасөспірімдер спорт мектебінің директоры Манарбек Бектияровқа алғысхат табыстады.
Ашылу салтанатында аудандық тарихи-өлкетану музейінің қызметкері Толқын Үмбеталиеваның Қази Срымовтың өмірбаяны бойынша дайындаған деректі фильмі көрсетілді.
Облыстық деңгейдегі екікүндік турнир өте жоғары деңгейде өтті. Ауқымды турнирдің қатысушылары да мықты, дайындықтары өте жоғары деңгейде екенін көрсетті. Әр спортшының бойындағы сенімділігі мен біліктілігі жеңіске деген ынтасын арттырып, ойын көркін қыздыра түсті.
Бірінен бір асып түскен жас грек-римшілерді турнирдің құрметті қонақтары медаль, диплом, сыйлықтармен марапаттады.
Жалпы командалық есепте 2011-2012 жылы туған жасөспірімдер арасында Бөрлі ауданы ІІІ, Шыңғырлау ауданы ІІ, №1 Олимпиадалық резервтің мамандандырылған балалар мен жасөспірімдер мектебі І орынды иеленсе, 2013-2014 жылы туған спортшылар бәсекелестігі бойынша Шыңғырлау ауданы ІІІ, №1 Олимпиадалық резервтің мамандандырылған балалар мен жасөспірімдер мектебі ІІ, РФ Орынбор қаласы жүлделі І орынды иеленді.
Гүлжазира Асу
Шыңғырлау ауданы
