Биыл Теректі ауданының жастары үшін де олжалы жыл болғаны рас. Аудандық жастармен жұмыс жөніндегі ресурстық орталық көптеген жасқа бағыт-бағдар беріп, қоғамдық жұмыстарда белсенді болды.
Атап айтсақ, ауылдық округтердегі жастар жетекшілері талай игі іске мұрындық болып, ел ортасынан табылды. Тасқын судың кезінде жұдырықтай жұмыла білді. Сондай-ақ рухани кештер мен подкаст жобасын қолға алып, жастар алаңына айналған Жайдарман ойындарының да жаңа тынысын ашты.
Облыс орталығында «ЖРО премиясы – 2024» салтанатты іс-шарасы өтті. Аталған басқосуда теректілік жастардың еңбегі еленді.
Данияр Рахымғалиұлы «Ең өнерпаз маман» аталымына, Майра Нұрымжанқызы «Көпбалалы маман» аталымына ие болды. Айта кету керек, бұл кеште 13 аталым бойынша үздік азаматтар марапатталды.
Мұндағы мақсат – жыл бойы қоғам серпілісіне үлес қосқан, еңбегімен көзге түскен өңірдің қозғаушы күштерін қолдау.
Ақтілек Орынбасар
Теректі ауданы
