Облыстық спорт басқармасы қарамағындағы балалар мен жасөспірімдерге арналған 22 спорт мектебі жоғары жетістіктер спортын дамыту және спорт резервтерін дайындау қызметін жүзеге асыруда. Биыл спорт мектептерінде 14 270 бала жаттыққан. Оның ішінде 9467-сі олимпиадалық спорт түрлерімен, 4803-і олимпиадалық емес спорт түрлерімен айналысады. Сондай-ақ мемлекеттік спорттық тапсырыс аясында 15 бала спортпен тегін айналысады.
Спорт мектептерінде 61 спорт түрі бойынша жаттығу өтеді. Оның ішінде 31-і – олимпиадалық, 21-і – олимпиадалық емес, 9-ы – ұлттық спорт. Өңірде 661 жаттықтырушы тіркелген.
Спорт мектептерінен бөлек өңірде олимпиада резервінің облыстық мамандандырылған мектеп-интернат-колледжі жұмыс істейді. Аталған спорт ұйымында тәрбиеленушілер 12 олимпиадалық спорт түрімен айналысады. Биылғы оқу жылында 242 оқушы, 63 студент қабылданды. Жалпы мекемеде 31 жаттықтырушы қызмет етеді.
Биыл ресми республикалық және халықаралық жарыстарда (Әлем, Азия, ҚР чемпионаттары) облыс спортшылары 1230 медаль жеңіп алды. Оның 412-сі – алтын, 415-сі – күміс, 403-і – қола.
Командалық спорт түрлеріне келер болсақ, волейболдан «GRACIA-KZ» әйелдер командасы – жоғары лига ойындарының жеңімпазы атанып, ұлттық лигаға жолдама иеленді. Волейболдан қыздар командасы ҚР чемпионатының жеңімпазы атағына қол жеткізді. Волейболшы ерлер де намысты қолдан бермеді. «Жайық» командасы ҚР кубогінде 2-орын иеленді. Құрылғанына көп уақыт болмаса да, «Бәйтерек» футзал клубы жақсы нәтижеге қол жеткізе бастады. Аталған клубтың U-19 командасы 2023-2024 жылғы маусымда жастар арасындағы ҚР шемпионатының жеңімпазы атанды. Облыстың қол добы командасы жасөспірімдер арасындағы ҚР чемпионатын жеңіп алды.
Облыс спортшыларының ірі сайыстарда жеңіп алған жүлделеріне тоқталсақ. Биыл өңір спортшылары Азия чемпионаттарынан 74 алтын, 52 күміс, 32 қола жүлде алып келді. Әлем біріншіліктеріне барған облыс атлеттері 12 алтын, 14 күміс, 19 қола жүлде жеңіп алды. Ал Астана төрінде жалауы желбіреген дүниежүзілік көшпенділер ойындарында 1 алтын жүлде қанжығаладық.
Биылғы жеңімпаздар мен жүлдегерлер
Алина Әжіғалиева – шорт-тректен юниорлар арасындағы Әлем чемпионатының күміс жүлдегері
Мария Бровкова – байдарка мен каноэ есуден әлем чемпионатының қола жүлдегері, Азия чемпионатының жеңімпазы және қола жүлдегері
Андрей Ергучев – байдарка мен каноэ есуден Азия чемпионатының күміс жүлдегері
Анастасия Панасович пен Зейнеп Баянова – әйелдер күресінен ересектер арасында Азия чемпионатының қола жүлдегері
Әділбек Ерболатов – еркін күрестен жасөспірімдер арасында Азия чемпионы
Өнер Сейілхан – бокстан жастар арасында әлем чемпионы
Бекнұр Серіков – теңге ілуден Дүниежүзілік көшпенділер ойындарының жеңімпазы
Назгүл Ізмағамбетова – пара каратэден әлем чемпионы
Абзал Ахметкерей – тірек-қимыл аппараты зақымдалған спортшылар арасында пара таеквондодан (пумсе) әлем чемпионатының күміс жүлдегері.
Темірлан Көлбай, Нығмет Серікбай – самбодан әлем чемпионатының жеңімпазы.
Түгелбай Кенжеғалиұлы
zhaikpress.kz
