Шыңғырлау ауданы әкімдігі мен білім бөлімінің ұйымдастыруымен білім беру саласындағы үздік педагогтерді марапаттауға арналған «Үздіктер шеруі» атты салтанатты кеш өтті.
Шараның басты мақсаты – республикалық және облыстық байқауларда оза шауып, үздік нәтиже көрсеткен ұстаздарды құрметтеу, олардың ерен еңбегін бағалау және келешек ұрпаққа өнеге ету.
Кештің ашылуында аудан әкімі Мұрат Амангелдіұлы, аудандық білім беру бөлімінің басшысы Қуаныш Ығылманұлы және шара қонақтары ардагер ұстаз Адақ Таңабайұлы мен самбодан екі дүркін әлем чемпионы Қайсар Саинұлы құттықтау сөз сөйлеп:
– Ұстаздық – ұлы мамандық. Бүгінгі жетістіктеріңіз – қажырлы еңбектеріңіздің, білімге деген адалдығыңыздың және шәкірттеріңізге деген сүйіспеншіліктің нәтижесі. Сіздердің әрбір жетістіктеріңіз – ауданымыздың, еліміздің білім саласындағы үлкен жеңісі, – деді.
Шара барысында республикалық «Үздік авторлық бағдарлама», «Алтын тұғыр» олимпиадасы, «Сапалы білім сапалы сабақтан» ашық сабақтар шеруі, сондай-ақ облыстық байқаулардың жеңімпаздары марапатталды. Жалпы 2024 жылы ауданнан 35 ұстаз республикалық және облыстық байқауларда жүлделі орындарға ие болған.
Әр марапат иесіне арнайы алғысхаттар мен естелік сыйлықтар табыс етілді.
Шара әсерлі концерттік бағдарламамен жалғасты. Кеш барысында аудан өнерпаздары мен ұстаздар қауымы әсем әндер орындап, ерекше қойылымдар ұсынды. Шарада «Шам» театрының көркем қойылымы, «Ұстазым» әні, «Мың алғыс саған, Ұстазым» шығармасы және басқа да өнер нөмірлері көрермендерге керемет көңіл-күй сыйлады.
«Үздіктер шеруі» ұстаздарға деген құрметтің, олардың еңбегін бағалаудың жарқын көрінісі болды. Кеш соңында барлық марапат иелері мен шараға қатысушылар естелік суретке түсіп, ұйымдастырушыларға ризашылықтарын білдірді.
Аида Шакит
Шыңғырлау ауданы
