Орал қаласында волейболдан 2008-2009 жылғы қыздар арасында Қазақстан қысқы чемпионаты мәресіне жетті.
Фото: «Грация KZ» клубынан
Біріншілікке барлығы 13 команда қатысып, жүлделерді сарапқа салды.
Жарыс қорытындысында Оралдың «Грация KZ» командасы жеңімпаз атанды.
Солтүстік Қазақстан облысының қыздары күміс жүлдеге қол созса, ақтөбеліктер үздік үштікті түйіндеді.
- Мұндай бәсекенің жас қыздардың шеберлігін арттыруда маңызы зор. Оған қоса ертең негізгі ойыншылардың орнын басатын резервтің қаншалықты екендігін біле түсеміз. Осы құрамнан оралдық үш қыз Петропавлда ұлттық лига командалары арасындағы Қазақстан чемпионатында өнер көрсететін «Грация KZ» клубына қосылды, - деді Kazinform тілшісіне «Грация KZ» командасы бапкерлерінің бірі Нұрсұлу Ғұбашева.
Еске сала кетейік, бұдан бұрын Петропавлда волейболдан әйелдер арасында ұлттық лига командалары сынға түсетінін жазған болатынбыз.
Дереккөз: ҚазАқпарат
