Теректі аудандық мәдени-демалыс орталығының кіші мәжіліс залында аудандық білім беру бөлімінің қолдауымен, аудандық оқу-ағарту және ғылым қызметкерлері кәсіподақ комитеті филиалының ұйымдастаруымен салалық кәсіподақтың 100 жылдығына орай, жас педагогтар арасында «Қазақша.QUIZ» облыстық интеллектуалдық ойыны өтті.
Кәсіподақ ұйымдарының жұмысын жетілдіру және бірлігін нығайту, жастар саясатын қалыптастыру, аудандардағы ұстаздар арасындағы байланысты дамыту мақсатында өткен білімділердің бұл аймақтық сайысына Шыңғырлау, Бөрлі, Қаратөбе, Сырым, Бәйтерек және Теректі аудандарының жас педагогтары қатысып, бақ сынады.
Зияткерлер сайысында алты ауданның командасы «Жауап», «Біз білетін ән», «Көрген кино», «Бұл кім?» және «Бұл қай қала?» кезеңдері бойынша сынға түсті.
Барлық кезеңнен де мүдірмеген шыңғырлаулық жас ұстаздар жарыс жеңімпазы атанса, Сырым ауданынан келген педагогтар екінші орын иеленді. Бәсекелестерінен бір ұпаймен ғана ұтылған теректілік зияткерлер сайысты үшінші орынмен қорытындылады.
Аймақтық сайысқа қатысқан барлық командалар естелік сыйлықтармен марапатталса, ауыспалы кубок Шыңғырлау ауданында қалды. Келесі аймақтық интеллектуалдық сайыс Шыңғырлау ауданында өтеді.
Нұрлыбек Қайыржанов,
аудандық жастармен жұмыс жөніндегі
ресурстық орталығының директоры,
Шыңғырлау ауданы
