Өткен аптада Орал қаласында «Dance Art Festival»халықаралық би байқауы өтті. Еліміздің түкпір-түкпірінен би үйірмелері сынға түскен сайыста жаңақалалық жас бишілер де үздіктер қатарынан көрінді.
Жаңақала жалпы орта білім беретін мектебінің жанынан құрылған «Нұрбибі» хореографиялық ұжымының орта тобы ІІ орынды, ал кіші тобы ІІІ орынды иеленіп, биыл Түркия, Әзербайжан, Грузия елдерінде оздырылатын халықаралық би байқауына жолдама алды.
Жас өнерпаздардың жетістікке жетіп, жүлдегерлер қатарынан көрінуінде балаларды би әлемін түсініп қабылдауда талғампаздыққа тәрбиелеп, білімді, мәдениетті болып өсуіне әсер етудегі би өнерінің рөлі, қажеттілігі жайында қоғамдық сананы нығайтуды мақсат еткен үйірме жетекшісі Лунара Нұрланқызының еңбегі ұшан-теңіз.
Облыстық, республикалық, халықаралық байқауларда сан мәрте топ жарып жүрген «Нұрбибі» би ұжымына алда өтетін үлкен додада Алла жар болып, ел намысын абыроймен қорғап, жеңіс тұғырынан көрінулерін тілейміз.
Айзада Ақбасова,
Жаңақала ауданы
