Табиғи және техногендік сипаттағы төтенше жағдайларда шұғыл әрекет ету жөніндегі Бәйтерек аудандық жасағы көктемгі су тасқынына дайын. Бұл туралы Переметный ауылында өткен аталмыш жасақтың дайындығын тексеру барысында айтылды.
-Былтыр елімізде, соның ішінде облыс, ауданымызда орын алған су тасқыны кезінде бірлік танытып, жақсы дайындық болуының арқасында көп шығынға ұшыраған жоқпыз. Мұны тасқыннан соң облыс басшылығы да арнайы атап өтіп, бәйтеректіктерге алғыстарын айтқаны белгілі.
Биыл да әзірлігімізді мықтап, көктемгі су тасқынына жақсылап дайындалуымыз керек,-деген аудан әкімінің орынбасары Мұрат Залмұқанов орталық көшенің бойында сап түзеген он үш қызметтің дайындағынын тексеріп шықты.
Переметный ауылдық округі әкімінің орынбасары Мәулет Мұхтаровтың айтуынша, қазіргі уақытта әкімдікте су соруға арналған төрт помпа, екі генератор, 100 тонна құмды қиыршық тасты қоспа (пгс), 700 дана қап бар. Құм салынған 300 қап тұр. Құрал-жабдықтарға мен қажет заттарға тағы да қосымша тапсырыс беріліп жатыр. Жалпы бұл бағытта қолға алынған жүйелі жұмыстар жалғасуда.
Серік Маратұлы,
Бәйтерек ауданы
