Теректі ауданына қарасты Аңқаты ауылында жаңа ветеринарлық пункт ашылып, халық игілігіне қолдануға берілді. Жаңа нысанның ашылуына аудан әкімінің орынбасары Дамир Гумаров, облыстық ветеринария басқармасының басшысы Абзал Бралиев және "AMANAT" партиясы аудандық филиалының атқарушы хатшысы Мирхат Ибраев қатысты.
"ҚР Президенті Қасым-Жомарт Тоқаев жыл сайынғы халыққа Жолдауында ауыл шаруашылығы, соның ішінде ветеринария мәселесін назардан тыс қалдырған емес. Нәтижесінде жоғарғы бюджеттен қаражат бөлініп, мал дәрігерлік саласына арналған жаңа нысандар бой көтеруде. Бүгін осындай қуанышты аңқатылық ағайынмен бөлісіп тұрмыз.
Ауыл болған соң, тұрғындардың негізгі табысы, тұрмыс-тіршілігі мал шаруашылығымен тікелей байланысты. Осы орайда ауыл тұрғындарын жаңа-жылдың басында ашылған жаңа нысанмен құттықтаймын! Қорамыз малға, іргеміз жанға толсын!", деді басқарма басшысы Абзал Серікұлы.
Ауыл ақсақалы Әлібек Орынғалиев те ақжолтай жаңалықпен жерлестерін құттықтап, ел бірлігі мен тыныштығын тіледі.
Нысанды қолданысқа берген бас мердігер "БАТАЛАСУ" ЖШС директорының орынбасары Шоқан Ахметов Аңқаты ауылдық округінің ветеринариялық пунктінің меңгерушісі Нұрғали Арыстановқа жаңа ветпункт кілтін табыстаса, лента қию рәсімі Абзал Серікұлы мен ауыл ақсақалы Әлібек Тұрсынұлына берілді.
Бүгінде Аңқаты ауылдық округінде төрт ветеринария маманы қызмет ететін болса, көлемі 24 шаршы метрді құрайтын жаңа ветпункт мал дәрігерлеріне қажетті құрал-жабдықтармен қамтылған. Сонымен қатар пункт аумағында мал емдеуге, егуге, ветеринарлық көмек көрсетуге арналған темір қоршау да салынған.
Аталмыш округте ірі қара - 5454 бас, уақ жандық - 6022 бас, жылқы саны - 1426 басты құрайтынын ескерсек, бұл нысан ел үшін өте қажет.
Рауан Сатыбалдиев,
Теректі ауданы
