Ауғанстан Демократиялық Республикасынан Кеңес әскерінің шектеулі контингентін шығарылғанына 36 жыл толуына арналған шара өз жалғасын спорт кешенінде тапты. Айтулы күнге орай ерлер арасында волейболдан халықаралық турнир өтті.
Спорттық сайысқа РФ Астрахан облысы Ахтубинск қаласының Қорғаныс министрлігіне қарасты В. Чкалов атындағы мемлекеттік ұшыру-сынақ орталығының командасы, Жәнібек ауданының мемлекеттік қызметшілер командасы, Шекара басқармасы командасы, Бөкей ордасы ауданының мемлекеттік қызметшілер командасы қатысты.
Мемлекетіміздің гимнімен басталған шара барысында аудан басшысы Нұрлыбек Даумов қатысушыларға «қош келдіңіздер!» деп, сәттілік тіледі. Ауған соғысының ардагері Нағим Баткенов те доп додасына сәттілік тілеп, ұйымдастырушыларға алғысын айтты.
РФ әскери бөлімінің командир орынбасары подполковник Дмитрий Ржевский де шара ұйымдастырушыларына ризашылығын білдірді.
Спорттық сайыс қорытындысында ресейлік командасы І орынға лайық танылса, ІІ орынды Жәнібек ауданының мемлекеттік қызметшілер командасы, ІІІ орынды Бөкей ордасы ауданының мемлекеттік қызметшілер командасы иеленді.
Барша қатысушыларға заттай сыйлық пен диплом табысталды.
Еркебұлан Рахметолла
Бөкей ордасы ауданы
