Әкелер күніне орай, Жаңақала аудандық орталықтандырылған кітапхана жүйесі әке мен бала арасында отбасылық сайысын ұйымдастырды. Мақсаты – отбасылық құндылықтарды насихаттау.
Шараның шымылдығын мекеме әншісі Талғат Бисенғалиевтің орындауында «Менің әкем алтын адам» әнімен ашқан соң жарысқа қатысушы үміткерлер ортаға шақырылды.
Жеке тоқталар болсақ, №3 ЖОББ мектебінің ұстазы Данияр Мұратұлы мен ұлы Мұрат Ибрахим, «Сичим» құрылыс компаниясының шебері Бауыржан Ислямов пен ұлы Әли Ахмет, №3 ЖОББМ дене тәрбиесі пәнінің мұғалімі Аңсар Молдағалиев және ұлы Айсұлтан Сырлыбай, сондай-ақ аудандық жастармен жұмыс жөніндегі ресурстық орталығының басшысы Дәурен Мерешов пен қызы Інжу Ғұбайдолла. Таныстыру, «Таны да тап!», «Әке – шешен», «Шебер қолдар», Ұлттық ойын - садақ ату секілді бес бөлімнен құралған додада әке мен баланың өзара татулығы мен ұлттық дәстүрлерге деген құрметі сыналды. Қатысушылар бірінші кезекте отбасындағы ынтымақты көрсетіп, өнерлерін паш етіп, көрерменге ерекше көңіл-күй сыйлады.
Қызықты өткен тәлімді шара соңында кітапхана жүйесінің басшысы Дина Даниярқызы мерекелік құттықтауын жолдап, қатысушы отбасыларды марапаттады.
Айзада Ақбасова,
Жаңақала ауданы
