ҚР Конституциясының 30 жылдығына орай Сырым аудандық «Жас туристер станциясы» жергілікті тұрғындар мен кәсіпкерлер арасында «Ауылым - тұнған шежіре» атты экскурсиялық бағдарлау жарысын ұйымдастырды.
“Туған жердің тылсым сырын ұғып көр!” - деп Қадыр Мырза Әли жырлағандай, шараның мақсаты - халыққа өздерінің туған өлкесінің тарихи шежіресін таныстыру.
- Тарихи - мәдени мұраларды тану, салауатты өмір салтын насихаттау және кәсібінен нәсіп тапқан еңбек иелеріне құрмет - міне, жарысымыз осы негізгі үш мақсатты біріктіреді, - дейді жас туристер станциясы мекемесі директорының міндетін уақытша атқарушы Руслан Шуйншкалиев.
Шараның салтанатты ашылуында Сырым аудандық ішкі саясат бөлімінің басшысы Тимур Кубаев сөз сөйледі. Тимур Берікұлы біздің бейбіт тұрмысымыздың кепілі - ҚР Конституциясына әркім құрмет етуі керектігін, ішкі туризмді дамыту мәдени - тарихи орындарды танудан басталатынын, экскурсиялық бағдарлау жарысы соған жарқын қадам екенін атап өтті.
Қатысушылар қолдарына берілген карта бойынша Жымпиты ауылында орналасқан белгілі тұлғаларға арналған ескерткіштердің, Алашорда үкіметінің жұмысы мен тұлғаларына қойылған монументтің, мемлекеттік қорғауға алынған ХІХ ғасырдың тарихи ескерткіші - ескі мешіт пен шіркеудің орыны нүктелермен жүріп өтіп, өлкетану бойынша жазбаша тапсырмаларды орындады. Шараға “АҚҚУ” дүкендер желісінің иесі, жеке кәсіпкер Г.Нигметова демеушілік қылды.
Бауыржан Ширмединұлы,
Сырым ауданы
