Бүгін Орал қаласындағы «Атамекен» өнер ордасында Қазақстан халқы Ассамблеясының 30 жылдығына арналған «Бірлік пен келісім жолындағы 30 жыл» атты салтанатты іс-шара өтті.
Ел бірлігінің символына айналған бұл жиынға өңірдің этномәдени бірлестіктері, ардагерлер, жастар ұйымдары, қоғам қайраткерлері мен зиялы қауым өкілдері қатысты.
Салтанатты жиында Батыс Қазақстан облысының әкімі, облыстық Қазақстан халқы Ассамблеясының төрағасы Нариман Төреғалиұлы Төреғалиев құттықтау сөз сөйлеп, өңірдің бірлік пен татулықты сақтау бағытындағы игі бастамалары мен Ассамблея құрылымдарының белсенді еңбегіне тоқталды.
Аталмыш шарада ел бірлігі мен қоғамдағы келісімді нығайтуға, рухани-мәдени дамуға айрықша үлес қосқан бірқатар азаматтарға Қазақстан халқы Ассамблеясының жоғары наградалары табысталды.
Шара мерекелік концерттік бағдарламамен жалғасты. Өнер ұжымдары көпұлтты мәдениеттің әсем әуенімен өрілген қойылымдар ұсынып, қонақтарға ғажап көңіл-күй сыйлады.
Жанерке Мерекеқызы
Суретке түсірген: Мәди Салық
«Орал өңірі»
