Қаратөбе ауданы бойынша ауылдық округтерде жаңа әкімшілік ғимараттар салу және материалдық-техникалық базаны жаңарту бағытында жүйелі жұмыстар жүргізілуде. Бұл бастамалар ауылдық жерлерде мемлекеттік қызмет көрсету сапасын арттыруға және инфрақұрылымды жақсартуға бағытталған.
Осы жұмыстар аясында Қаратөбе ауданының әкімі Қадыржан Орынбасарұлының қолдауымен, аудандық бюджеттен бөлінген қаражат есебінен Егіндікөл ауылдық округінде жаңа әкімшілік ғимаратының құрылысы аяқталып, пайдалануға берілді.
Ғимараттың ашылу салтанатында сөз алған аудан әкімі Қ. Сүйеуғалиев жаңа нысанның ауыл тұрғындары үшін маңыздылығын атап өтіп, ауыл инфрақұрылымын дамыту бағытындағы жұмыстар алдағы уақытта да жалғасын табатынын жеткізді.
Салтанатты шара барысында Егіндікөл ауылдық округі әкімі аппаратында ұзақ жылдар қызмет атқарып, зейнеткерлікке шыққан, мемлекеттік қызмет саласының ардагері Қадырбек Баубеков ауыл тұрғындарын жаңа ғимараттың ашылуымен құттықтап, ізгі тілегін білдірді.
Шара барысында ғимараттың құрылысын жүзеге асырған «МТС Регион» жауапкершілігі шектеулі серіктестігінің басшысы Тілек Кереев Егіндікөл ауылдық округінің әкімі Зейнолла Ғойноллаұлына жаңа әкімшілік ғимаратын кілтін табыстады.
Жаңа әкімшілік ғимарат заманауи талаптарға сай салынған. Мұнда қызметкерлер мен тұрғындарға қолайлы жағдай жасалып, қажетті материалдық-техникалық база толық қамтылған.
Жаңа нысан Егіндікөл ауылдық округінің әлеуметтік-экономикалық дамуына серпін беріп, халық пен билік арасындағы байланысты нығайта түсері сөзсіз.
Р.Абай,
Қаратөбе ауданы
