Жәңгір хан атындағы Батыс Қазақстан аграрлық-техникалық университетінде 8 наурыз – халықаралық әйелдер күніне орай «Гүл сыйлайық әйелге!» атты мерекелік іс-шара өтті.
Жоғары оқу орнындағы нәзік жандардың құрметіне орайластырылған салтанатты жиында университеттің басқарма төрағасы-ректор Асқар Наметов ұжымдағы қыз-келіншектерді, аруларды төл мерекелерімен құттықтап, олардың оқу орнының гүлденуіне, ғылыми әлеуетінің өркендеуіне, білім-ғылым саласының дамуына қосқан үлестері зор екенін атап өтті.
Кеш барысында білім ордасының дамуына, кәсіби мамандар даярлау ісіне атсалысып жүрген бір топ мереке иелері марапатталды. Доцент, физика-математика ғылымдарының кандидаты Шолпан Махмудова ҚР Ауыл шаруашылығы министрлігінің Құрмет грамотасымен марапатталса, «Парасат» ақпараттық білім беру орталығының директоры Айгүл Есенаманова ЖОО қауымдастығының «Жоғары кәсіптік білім беру саласындағы үздік менеджер» төсбелгісіне ие болды. Сонымен қатар бір топ ғалым-ұстаздар мен қызметкерлер облыс және қала әкімінің алғыс хаттарын, университет ректорының алғыс хаттарын және Құрмет грамотасын иеленді.
Салтанатты жиын ұжымның ер-азаматтарының күшімен дайындалған концерттік бағдарламамен жалғасты. Жігіттер аға буын өкілдеріне кеңінен таныс «Ялла» тобына пародия жасап, көрерменге көтеріңкі көңіл күй сыйлады. Өзге де шығармашылық ұжымдар мен өнерлі ер-азаматтар мерекелік лебіздерін әсем ән-бимен жеткізді.
БҚАТУ баспасөз қызметі
