Қытайда бастауыш және орта мектеп оқушыларының жартысынан көбі жасанды интеллектті пайдаланады. Бұл туралы елдегі балалар мен жасөспірімдерді ғылыми-зерттеу орталығы жүргізген ұлттық сауалнама деректері куәландырып отыр, деп хабарлайды China Daily.
Фото: Xinhua
Сауалнамаға сәйкес, мектеп оқушыларының 60%-дан астамы нейрожелілермен жұмыс істеу тәжірибесіне ие және бестен бір бөлігі ЖИ құралдарын үнемі пайдаланып жүр. Кең ауқымды зерттеу елдің жеті аймағы, соның ішінде Бейжің, Гуандун және Хэнань провинцияларындағы 8500 оқушыны қамтыды.
Сұралғандардың шамамен 71%-ы ЖИ-ді ақпарат іздеу және үй тапсырмасын орындау кезінде пайдаланады. Мектеп оқушыларының тағы 40%-ы нейрожелілер көмегімен өлеңдер, суреттер және плакаттар сияқты шығармашылық жобалар жасайды.
Жастардың айтарлықтай бөлігі ЖИ-дан эмоционалды қолдау тауып жүр. Мектеп оқушыларының 35%-дан астамы чат-боттармен хат жазысып, олармен өз сезімдерімен бөліседі. Оқушылардың шамамен 32%-ы бұл технологияларды ойын-сауық мақсатында пайдаланып жүр.
Айта кету керек, 2025 жылы Қытайдың Білім министрлігі мектептерде технологияларды пайдалануды реттейтін арнайы нұсқаулар шығарды. Ережелерде оқушылардың жасына байланысты көпдеңгейлі тәсіл қарастырылған.
Бастауыш сынып оқушыларына үй тапсырмасын орындауда генеративті ЖИ пайдалануға тыйым салынды. Орта сынып оқушылары нейрожелілер арқылы жасалған мазмұнды зерттей алады. Жоғары сынып оқушыларына алгоритмдердің техникалық принциптерін үйренуге рұқсат етілді.
Сәуір айында тиісті ведомство сондай-ақ мектеп бағдарламалары, күнделікті оқыту және бағалау жүйелеріне ЖИ енгізу жоспарларын жариялады.
Дереккөз: ҚазАқпарат
